މޫދަށް އެރެން ޝައުގާ އެކީ، ބިންގަނޑު ފަޅާފައި ނުކުމެގެން

    މޫދާ ދިމާލަށް ބޯ ޖަހާ، ފިޔަ ގަނޑު އަޅާ ކޮއްޕާ ލައޭ

ބިރުވެރި ކަމާ އެކުގައި ފަށާ، ސަހަރޯ މިއީ ދަތުރެއް އިނގޭ

    ދިރުމެއް އަދާ ލެއްވުން މިތާ، އެދިގެން ކުރާ ދަތުރެއް މެއޭ

އިރުއިރު ކޮޅުން ގޯނާ ކުރަން، އަނިޔާވެރިން ތައްޔާރުވޭ

    ބިރުވެރި ކަމާ އެކުގާ ހެމުން، އަޑުއަޑު ލަމުން އަންނާނެއޭ

ވަކިތަކު ދަށުން މިނިވަން ވުމީ، އެސޮރަށް އެހާ އުނދަގޫ ކަމެއް

    ވަކިވެން ބޮލާ ކަނދުރާ ދެއޭ، ތުންގަނޑު ހަރާ އޮއްބާލައޭ

ދަންޖާލުގައި ޖެހިގެން ދެއޭ، ފައިގާ ނަދާ ކަކުނީގެ ވާ

    ދަންމަރު ލައޭ ރޫޙުގެ ނިވާ، އަނިޔާ ދެމުން ރޮއްވާފައޭ 

ލޮނުގަނޑު ތެރަށް ފީނާލުމުން، ފިނިކަން ހިތަށް ކުޑަކޮށް ލިބޭ

    ހޮނު ގުގުރިއެއް ޖެހިހެން ނިކަން، ލޮނުރަހަ އަރުން ގަދަ ކޮށްލައޭ

ތޫނޭ އެހާ ދަތްތަށް އެވާ، ފޫގޮއްސިއޭ ތޮށިގަނޑު ފަޅާ

    ހޫނޭ އެދިން ހަމަލާ މެއަށް، ކުދި ކުދި ވެގެން ހަށިގަނޑު ދެއޭ

އެތަކެއް ފުރާނަ މިދުނިއެއާ، ވަކިވާން ޖެހޭ ދަތުރެއް މިއީ

    އެތަކެއް ދަލާ ލޭ އޮހޮރުވާ، މަދު އަދަދަކަށް ދިރުމެއް ވެއޭ