"ކާންދޭ އަތުގައި ދައިނުގަންނާށެވެ". މިއީ އަދަބީބަސްތަކުގެ ތެރެއިން ހަރުބަހެކެވެ. މި ބަހަކީ ވަރަށް ހިކުމަތްތެރި ބަހެކެވެ. ނަސޭހަތް ދިނުމުގެ ގޮތުންނާއި، އިންޒާރު ދިނުމުގެ ގޮތުންވެސް މި ބަސް ބޭނުންކޮށް އުޅެއެވެ.

މިބަހުގެ ބަހަވީ މާނައަށް ބަލާލަމާ ހިނގާށެވެ. މިބަހުގައި މި ބުނަނީ ކާންދޭން މީހާ ކާންދޭ އިރު، ނުވަތަ ލަވައިދޭ އިރު އޭނާގެ އަތުގައި ދައި ނުގަންނާށެވެ. އެހެނީ އެއީ ތިބާއަށް ކާންދޭ މީހާއެވެ. އޭނާއަށް ތަދެއް، ތުރާލެއް، ވޭނެއް، ތަކުލީފެއް ނުވަތަ ބުރައެއް ތިމާގެ ފަރާތުން ނުޖައްސާށެވެ. ތިބާއަށް ކާންދޭ މީހާ ތިބާއާއި މެދު ހިތްހަމަނުޖެހުމެއް ނުވަތަ ހިތްބުރަކަމެއް ބަހައްޓައިފިނަމަ، އެކަމުގެ ސަބަބުން ތިބާގެ ކާނާއަށް ގޮތެއް ހަދާ ތިބާއަށް އަނިޔާއެއް ދީފާނެތީއެވެ. ކާނާއަށް ވިހަލާ ތިބާ މަރާލަފާނެތީއެވެ. ނުވަތަ ތިބާއަށް ކާންނުދީ ހުރެފާނެތީއެވެ. އެހެންކަމުން ކާންދޭ އަތުގައި ދައިގަތުމަކީ އޭގެ ސަބަބުން ގެއްލުންތަކާއި ކުރިމަތިލާން ޖެހޭނޭ ކަމެކެވެ.

މިބަހުގެ ހަގީގީ މާނައަށް ވިސްނާލަމާ ހިނގާށެވެ. މިބަހުގައި މި ބުނެދެނީ ތިބާއަށް އަޅާލާ، ތިބާއަށް ވަފާތެރި، އޯގާތެރި އަދި އިހްލާސްތެރި މީހުންނަށް އެއްވެސް ޒާތެއްގެ އަނިޔާއެއް، ގެއްލުމެއް ނުވަތަ ކެއްސެއް ދީގެން ނުވާނެއެވެ. ނަސޭހަތްތެރި ވުމުގެ ގޮތުން، އާންމުކޮށް މި ބަސް ބުނެ އުޅެނީ ރަހުމަތްތެރިންގެ މެދުގައެވެ. މިނޫނަސް ނަސޭހަތުގެ ގޮތުގައި މިބަސް ބޭނުންކުރެވޭ ބައިވަރު ހާލަތްތައް ހުންނާނެއެވެ. ހަމަ އެއާއިއެކު އިންޒާރުގެ ގޮތުގައި މިބަސް އާންމުކޮށް ބޭނުން ކޮށް އުޅެނީ ސާހިބުން، ނޯކަރުންނަށް އަދި ވެރިން، މުވައްޒަފުންނަށެވެ. އެމީސް މީހުންގެ މަސައްކަތުގައި ފަރުވާ ކުޑަކުރުމުގެ ސަބަބުން ނުވަތަ އެބައިމީހުން ކުޅަ ވިޔާނުދާ ކަމެއްގެ ސަބަބުން މިފަދަ އިންޒާރުތައް ދީ އުޅެއެވެ.

މިސާލަކަށް، މީހަކު އޭނާ ވަޒީފާ އަދާކުރާ ތަނުގެ ބޮޑު މީހާ ބުނާގޮތް ނުހަދާ އުޅޭ ހާލަތެއްގައި، އޭނާގެ އެކުވެރިން، އޭނާއަތް ނަސޭހަތްތެރި ވުމުގެ ގޮތުން ކާންދޭ އަތުގައި ދައި ނުގަންނާށޭ ބުނެއުޅެއެވެ. ހަމައެއާއިއެކު މިހާލަތުގައި އޭނާގެ ބޮޑުމީހާ އޭނާއާއި ދިމާލަށް އިންޒާރެއްގެ ގޮތުން ކާންދޭ އަތުގައި ދައި ނުގަތުމަށް އިންޒާރިދީފާނެއެވެ.

މި ދެގޮތަށް މިބަސް ބޭނުން ކުރެވުނަސް، މިބަސް އާންމުކޮށް ބޭނުން ކުރެވެނީ ނަސޭހަތް ދިނުމުގެ ގޮތުންނެވެ.