އެކިފަންނުތަށް ދިވެހިން ދަނޭ، ވިސްނާ ކުރާ ފިކުރާ މޮޅޭ
ހެކިވާ އެތަށް ކަންތައް ތަކެއް، މިވުޖޫދުގައި ދައްކާ އޮތޭ
ބޭރުގެ އެތައް ސައްޔާޙުނެއް، މިގޮތަށް މިކަން ލިއެފާ ވެއޭ
މޭރުން ކުރޭ މިކަމުން ނިކަން، ދިވެހިން ވަރެއްވާ ހަމަނެތޭ
ނައުޒޯނގުތަށް ބައްތެލިތަކާ، ނިރޮޅުން ހަދާ ދުއްވާ އުޅޭ
ބައުވެއްޖެނަމަ އެހެލާ ހަދަން މޮޅު ގޮތްތަކެއް ހޯދާ އޮތޭ
ރުކުފަން އެގޮތްމިގޮތަށް ގަތާ، ރިލަޔެއް އެއިން ފަރުމާކުރޭ
ނުކުތާ އަކީ ފަންނުގެ ގޮތުން، ދިވެހިން ވަރެއް އަމުދުން ނެތޭ
އަންދާ ދަވާ މުރަކައިގެވާ، އުވަޔާ އެކީ ގެދޮރޭ އަޅާ
ފަންނާ އެކީ ހިރިގާ ތަޅާ، ތަރުތީބަކުން އަތުރާނެތޭ
ކަނޑު ކެޔޮޅުކަން ދިވެހިން ކުރީ، ޙިކުމަތުގެ ބޭނުން ކޮއްގެނޭ
ދަނޑު ފަގުތަކާ ކުޅި ފާ ތަކުން، އެތަކެއް ނަފާ ހޯދާ އޮތޭ
މުންޑާ ލިބާހާ ފޭލިވެސް، ވިޔަމުން އައީ ހުނަރާ އެކީ
ހުންނާނެހެން ޖީބާ އެކީ، ހެދުމެއްފަހާ ތުރުކޮއް އޮތޭ
ބަތްޕޮޅި ހަލައްޓާ ވަށިތަކާ، ޤުދުރަތުގެ ސާމާނުން ހަދާ
އަތްތެރި ކަމުން ހަދައޭ ކަދާ، ހުނަރާ އެކީ ފެންނަށް އޮތޭ
ބަންޖާ ފަރިއްސާ ރައިވަރާ، ލަވަޔާ ޅެމާ "ކާ" ވެސް ހަދާ
ފަންނުގެ ދަރިން ވަޒަނަށް މޮޅޭ، ޙިކުމަތް އެ ޢަމަލުން ދައްކަތޭ
ޝޭޙުން އަދީބުން އެދުރުނާ، ދިވެހިން ތެރޭގައި ވެސް ވިއޭ
ދޭހުން ރުހުން ލިބިފާ އެވާ، ފަނޑިޔާރު ގޭތައް ވެސް އޮތޭ
ހަތުރުން ފަހާ ފައްސާލުމަށް، ދުރު ވިސްނުމޭ އިސްކޮއް އޮތީ
ކަތުނޭ ދިވެހި ނުކުތީ މެއޭ، އައްޑަނަ އަކަށް ދިއްކޮށް ހިތޭ
ދިވެހިން ވަނީ މުޅި ދުނިޔެއަށް، ދައްކާ ނަމޫނާއެއް ކަމަށް
ދިވެހިންގެ ވިސްނުން ތޫނުކަން، ތާރީހުގައި ފެންނަން އޮތޭ
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން