ދިވެހި އަދަބީ ބަސްތަކުގެ ތެރެއިން ކަނބުރުގެއަކަށް ވަނިއްޔާ އަޅިބުރާނޭ ބުނާ ބަހަކީ މުސްކުޅި ބަހެކެވެ. ނަމަވެސް މިއީ ހިކުމަތުން ފުރިގެންވި ބަހެކެވެ.

މިބަހުގެ ބަހަވީ މާނައަށް ބަލައިލަމާ ހިނގާށެވެ. ކަނބުރުގެއަކީ އަބަދުހެން ގިރުނބާ ރޯކޮށްގެން އެއިން ދަގަނޑު ދޮންކޮށްހަދައިގެން ދަގަނޑު ތަޅަމުން ގެންދާ ތަނެކެވެ. އެހެންކަމުން، އެތާނގައި މަސައްކަތްކުރާންތިބޭ މީހުން ގައިގައިވެސް ހުންނާނީ ހުސް އަޅިއެވެ. އަދި ބޭރުން މީހަކު އެތަނަށް ވަނަސް އެމީހެއްގެ ގަޔަށްވެސް އަޅި ބުރާނެއެވެ. 

މިބަހުގެ ހަގީގީ މާނައަށް ބަލައިލަމާ ހިނގާށެވެ. ވިޔާނުދާ ބަޔެއްގެ ތެރޭގައި މީހަކު އުޅޭން ފަށައިފިނަމަ ނުވަތަ އެފަދަ ބަޔެއްގެ "ގެއަކަށް" ގިނަގިނައިން ވަދެއުޅޭނަމަ އެމީހުންގެ ސަބަބުން އެވަންނަ މީހަކު ބަދުނާމު ވާނެއެވެ. އެއީ ކުށެއް ނުކުރާ މީހަކު ކަމުގައިވިޔަސް ފަރުވާލެއް ނެތެވެ. 

މިސާލަކަށް ބަލައިލާނަމަ ވައްކަންކުރާ ބަޔެއްގެ ތެރޭގައި އުޅެން ފަށައިފިނަމަ އޭނާ ވައްކަން ކުރާކަމަށް ތުހުމަތު ކުރެވޭން ފަށައިފާނެއެވެ. އަދި އެބަޔަކު ކުޅަ ވައްކަމެއްގެ ސަބަބުން ކުށްނުކުރާ މައުސޫމު މީހާވެސް ކުއްވެރިންގެ ލިސްޓުގައި ގުނާނެއެވެ. ކަނބުރު ގެއަކަށް ވަނިއްޔާ އަޅިބުރާނޭ ބުނަނީ މިހެންވެގެންނެވެ. ކަނބުރު ގެއަކީ ކުއްވެރީންނެވެ. އެބުނާ އަޅި އަކީ ކުށްތަކުގެ ވާހަކައެވެ.