އިސްލާހު ވާން އެދޭނަމަ، ފަސްދީ ބަލަން ނުވާނޭ

    ގިސްލާ ރުއިން އެއީވެސް، ހައްލެއް ކަމަށް ނުވާނޭ

މާޒީގެ ހިތި ހަނދާންތައް، އައު ކޮށް ރުއިން ފުދޭހޭ

    ބާޒީގަ އާނ ކިޔަންވޭ، ހުއްޓިފަ ހުރެގެން ނުވާނޭ

ތަކުރާރު ކޮށް ކުރާނަމަ، އިސްލާހު ވެސް ވެވޭހޭ

    ބަރުބާދު ނޫން ގޮތެއް ހަމަ، އަމުދުން އެތާ ނުވާނޭ

އުފުލާ ދެއަތް ހިމޭނުން، ތައުބާ ވުމަށް އެދޭށޭ

    ކަފުނަށް އެރެން ޖެހޭކަން، އަބަދުމެ ހިތަށް އަރާނޭ

އަޒުމެއް ހިތާއި މޭގާ، ގުނަވަންތަކާ އެކީގައި

    އަޒުމުގަ ހިފާށެ ބާރަށް، ދޫކޮށް އެއިން ނުލާނޭ

އިސްލާހުވާން އޮތީ ހަމަ، މި މަގުން ހިނގުން އިނގޭހޭ

    މިސްރާބު ހެޔޮ ހިފާފައި، ކަސިޔާރު ކޮށް ނުލާނޭ