ދިވެހި ބަހުގެ އަދަބީ ބަސްތަކުގެ ތެރެއިން މުސްކުޅިބަހެއްގައި "ހަކުރު ދެންޏާ ބޮޑުބޭބެއެވެ" މިފަދައިން އޮވެއެވެ. އާދޭހޭވެ! މި ބަހުގައި މިބުނާ ގޮތަށް އަބަދުވެސް ކަންތައްތައް ތަރުތީބުވެގެން ދެއެވެ.

މިބަހުގެ ބަހަވީ މާނައަށް ބަލައިލުމުން ދޭހަވަނީ ތިމާ އަށް ހަކުރު ދޭ މީހަކީ ތިމާގެ ބޮޑުބޭބެއެއް ކަމެވެ. ބެލެވޭގޮތުގައި މި ބަހުގައި މި ބުނާ ހަކުރު ރައްދުވަނީ ދިޔާހަކުރަށެވެ. އެ ޒަމާނުގައި ދިޔާހަކުރަކީ މޮޅު ކެއުމެކެވެ. އެހެންކަމުން ތިމާއަށް އެފަދަ މޮޅު އެއްޗެއް، އަދި މޮޅު ނޫންނަމަވެސް އެއްޗެއް ދޭ މީހަކީ ތިމާގެ ބޮޑުބޭބެއެކެވެ.

މިބަހުގެ ހަގީގީ މާނައަށް ބަލައިލާނަމަ، މި ބަހުގައި މި ބުނީ މީހަކަށް އެއްޗެއްދީ ހެޔޮ ފޯރުކޮށްދޭ މީހަކީ އެމީހެއްގެ ވަރަށް ގާތް މީހެއްކަމެވެ. މިބަހުގައި ބުނާ ހަކުރުގެ މުރާދަކީ އެއީ ހެޔޮފޯރުވުން ނުވަތަ ކޮންމެވެސް އެއްޗެއް ދިނުމެވެ. ބޮޑުބޭބެއަކަށް އެމީހަކު ވާނޭކަން ބަޔާން އެ ކުރަނީ އެމީހަކާއި ތިމާ އާއި ދޭތެރޭ އުފެދޭ ގާތް ގުޅުމުގެ ސަބަބުންނެވެ.

މިސާލަކަށް ބަލައިލާނަމަ، ހާލުގައި ޖެހިފައިވާ ވަގުތު ނުވަތަ ހާލުގައި ޖެހުމަކާއި ނުލާ ވިޔަސް، ތިމާއަށް ހެޔޮފޯރުކޮށްދީ، އެހީތެރިވެދޭ، ދުރުހިލޭ ރަހުމަތްތެރިޔާވެސް އެ ހާލަތުގައި ގާތް މީހަކަށް ވެގެންދާނެއެވެ. މިފަދަ ސާއަތެއްގައި ހަކުރު ދެންޏާ ބޮޑުބޭބެއޭ ބުނެ އުޅެއެވެ.