އަލިހޮއްކޮ އަކީ ރާއްޖެތޭ ރަށެއްގައި ކިޔަވަން އުޅޭ ޒުވާނެކެވެ. ކޮންމެވެސް ޒާތެއްގެ ކޯހެއް ފުރިހަމަކުރަމުންދާ ހިތްވަރުގަދަ ކެރޭ ފިރިހެން ދަރިއެކެވެ. އެ ރަށުގައި ކިޔަވަމުން ދަނިކޮށް ކޯހުގެ އަމަލީ ތަޖުރިބާއަށް ރާއްޖޭގެ ވެރިކަން ކުރާ މާލެއަަށް އަންނަން ޖެހިއްޖެއެވެ.

ކޮންމެއަކަސް ކޮންމެވެސް ގޮތެއް ހޯދައިގެން އަލިހޮއްކޮ މާލެ އައިސް މިހުންނަނީ ހުޅުމާލޭގައެވެ. މެދު އުޑަށް އުފުލާފައި ހުރި ޓަވަރުތަކުން ޓަވަރެއްގެ މެދު ތެރޭގައެވެ. ނަމަވެސް އަލިހޮއްކޮ އަމަލީ ތަޖުރިބާއަށް އަންނަން ޖެހެނީ މާލެ އަށެވެ. އެހެންކަމުން އޭނާއަކީ މަންޒިލަށް ދަތުރުކުރުމުގައި ގިނަ ވަގުތު ތަކެއް ހޭދަކުރާ މުސާފިރެކެވެ. އޭނާގެ ދަތުރުތަކުގައި އިހްތިޔާރު ކުރީ ބަހެވެ.

ކޮންމެ ދުވަހެއްގެ ތަޖުރިބާއަށް އޭނާ މާލެ އަންނަނީ ބަހުގައެވެ. އެނބުރި ހުޅުމާލެއަށް ދަނީވެސް ހަމަ ބަހުގައެވެ. މިއީ އާދައިގެ މަތިން އަލިހޮއްކޮ މާލެ އައި ދުވަހެކެވެ. އަމަލީ ހަރަކާތުގައި ގިނަ ވަގުތު ތަކެއް ހޭދަކުރުމާއި އެކު ބުރަކޮށް އުޅެން ޖެހުމުން ވަރުބަލިކަން އިންތިހާއަށް އިހުސާސްކުރުވާ ދުވަހެކެވެ. ދުވަހުގެ އަމަލީ ތަޖުރިބާ ނިންމާލުމަށްފަހު އާދައިގެ މަތިން އަލިހޮއްކޮ މިއަދުވެސް ބަހަށް އަރައިފިއެވެ. މާލޭގެ ތާރުއެޅި މަގުމަތިން ބާރުބާރަށް ދުއްވާފާ އެ ދިޔަ ބަސް، ބުރިޖު މައްޗަށް އަރައިފިއެވެ.

ބަހުގެ ފަހަތު ސީޓެއްގައި ލެނގިލައިގެން އިން އަލިހޮއްކޮއަށް ލޯމެރިއްޖެއެވެ. ނިދިއްޖެއެވެ. ކަމަކުދާކަށް ނެތެވެ. ފުން ނިންޖަކުން ނިދައިފިއެވެ. އޭނާ އިން ބަސް، ހުޅުމާލޭގެ އެކި އެކި ބަސްހުއްޓިތަކަށްގޮސް ހުއްޓާ މަޑުކޮށް ހެދިއެވެ. އެންމެ ފަހު ބަސް ހުއްޓިއަށް މަޑުކޮށް އަރާނެ ބަޔަކު އަރުވާ، ފައިބާނެ ބަޔަކު ބޭލުމަށްފަހު ހުޅުމާލެއިން އެ ބަސް މާލެ ދިއުމަށް ދުއްވާލިއެވެ. އަދިވެސް އަލިހޮއްކޮ މިއޮތީ އަރާމުގައި ނިދާފައެވެ.

ވަގުތުތަކެއް ފަހުން އަލިހޮއްކޮއަށް ހޭލެވިއްޖެއެވެ. ސިހިފައި ތެދުވެ ބަހުގެ ކުޑަދޮރުން ބޭރު ބަލައިލި އިރު ފެންނާން ހުރީ ހުޅުމާލޭގެ މަންޒަރު ތަކެއް ނޫނެވެ. ހައިރާންކަމާއި އަންތަރީސްކަން އިންތިހާއަށް ވެރިވެފައި އިން އަލިހޮއްކޮ ދެން އެންމެ އަވަހަށް ހުއްޓި ތަނަކުން ފައިބާފިއެވެ. އަސްތާ ކަމަކުދާކަށް ނެތެވެ. އަލިހޮއްކޮއަށް މި ފޭބުނީ މާލެއަށެވެ.

ވީނުވީ އަލިހޮއްކޮއަށް ރެއަކާލައިފިއެވެ. އޭނާ އިން ބަސް ހުޅުމާލެ ގޮސް އެނބުރި މާލެ އަންނަންދެން އޭނާއަށް އެ އިނދެވުނީ ނިދާފައެވެ. އަލިހޮއްކޮއަށް މިކަން ފަހުމް ވުމާއެކު ދެރަވެސް ވިއެވެ. ލަދުވެސް ގަތެވެ. އަދި ނުލަފާ ހިންޏެއްވެސް އައެވެ.