ލިބުމަށް ނުވާ ދައްޗެއް އެތާ، އެއްވެސް ކަމެއް އެއްޗެއް އެތާ

     ލިބުމުން ހިޔާ އެތަނުގެ އަދާ، ފަހިކަން ލިބޭ ސުވަރުގެ އެއީ

މަރުވުން ނުވާނޭ އެތަނުގާ، މުސްކުޅި ވުމެއްވެސް ހަމަ ނުވާ

     ފަރުޟާއި ވާޖިބު އަޅުކަމެއް، ކުރުމެއް ނުވާ ސުވަރުގެ އެއީ

އުފުލިފަ އެވާ ދާންމަތި ތަކާ، ރަންރިހި ޖަވާހިރު ތަށިތަކާ

     އުފުލަން ޖެހޭ ވޭނެއް އެތާ، ބުރައެއް ނުވާ ސުވަރުގެ އެއީ

ގުރުބާން ތަކެއް ދުނިޔޭގަވެން، ހޯދޭނެ މިނިވަން ހިޔަލެކޭ

     ކުރުމަށް މަނާ ހަމަ އެއްކަމެއް، އަމުދުން ނުވާ ސުވަރުގެ އެއީ

ހައިހޫނުކަން ވެރިވެސް ނުވާ، ނިދުމާއި "ލުން" އަމުދުން ނުވާ

     ހައިބަތު އެހާ ބޮޑުކޮށް އެވާ، ފުރިހަމަ އެވާ ސުވަރުގެ އެއީ

ނިމުމެއް ނުވާ ދެމިގެން އެވާ، ގޯއްޗެއް އެއީ ފަހެ ދާއިމީ

     ނިމުމުން ހަޔާތް ދުނިޔޭގެވީ، ލިބުމަށް އެދޭ ސުވަރުގެ އެއީ