ދިވެހި އަދަބީ ބަސްތަކުގެ ތެރެއިން ހިޔަންޏަށް މުޑި ނުނަގާށޭ ބުނެވޭ ބަހަކީ މަޖާޒީ ބަހެކެވެ. ހިޔަންޏަށް މުޑިނެގުނަކީ ވަރަށްގިނަ މީހުންނަށް ކުރެވޭ ކަމެކެވެ. ނަމަވެސް ޒަމާނަށް އައިބަދަލާއެކު މި ބަސް ބޭނުންކުރެވޭ މިންވަރު މި ވަނީ މަދުވެފައެވެ.

މިބަހުގެ ބަހަވީ މާނައަށް ބަލާލާނަމަ، މިބަހުގައި މި ބުނަނީ ހިޔަންޏަކަށް މުޑިއެއް ނަގާ ވާހަކައެވެ. ބައެއް ޖަނަވާރުން، އެސޮރުމެންނަށް ފެންނަ ބައެއް ހިޔަނިތައް ދެކެ ބިރުގަނެއެވެ. އެފަދަ ހިޔަނިތައް ފެނި ބިރުން ސިހިގެން ދެއެވެ. ފިލަން ދުއްވައިވެސް ގަނެއެވެ. އަދި އަނެއްބައި ފަހަރު އެފަދަ ހިޔަނިތަކަށް ހަމަލާދޭން ވެސް އުޅެއެވެ. މިފަދައިން ހިޔަންޏެއްފެނި، އެއީ އަސްލެއްކަމަށް ދެކިގެން، ބައެއް ޖަނަވާރުން އުޅޭ އުޅުމަށް، ހިޔަންޏަށް މުޑިނެގުމޭ ކިޔައެވެ.

ހިޔަންޏަށް މުޑި ނުނަގާށޭ ބުނާ ބަހުގެ ހަގީގީ މާނައަކީ އެއްވެސް އަސްލެއް ނެތް ކަންކަމާއި ޖެހިލުންނުވާށޭއެވެ. ހަގީގަތެއް ނެތްކަންކަމާއި މީހާ ރުޅިއައީމާ އެފަދަ އަސާސެއް ނެތް ކަންކަމުގެ މައްޗަށް ބުރަވެހުރެ، ހިކި ހިތްވަރު އަރައިގެން ކުރެވޭ، ތާކުން ތާކުން ނުޖެހޭ ކަންކަން ނުކުރުމަށް، ހިޔަންޏަށް މުޑި ނުނަގާށޭ ބުނެއެވެ.