ކުށަށް އެއްބަސް ވުމުން އޭނާ، އަދަބު އެކުށުގެ ލިބެން ވާނޭ

    ކުށަށް އެއްބަސް ވުމުން އޭނާ، އަބުރު ކަތިލަން ނުވެސް ވާނޭ

 

އަދަބު އެކުށަށް ދިނުން ވާނީ، މަގުން ހައްގުގެ ހިނގުން ކަމުގާ

    އަދަބު ދިނުމުން އެކުރި ކުށަކަށް، ވުމެއް ގޯހެއް ނުވެސް ވާނޭ

 

ކުރާ ކުށަކަށް އަދަބު ދިނުމީ، ގޮތާ ފޮތުގައި އޮއެއް ކަމެކޭ

    ފުރާ ފުރިހަމަ ވެފާ ވުމަކީ، ކަމެއް އަދަބަށް ޔަގީން ވާނޭ

 

ދެވޭ އަދަބާ ކުރާ އަނިޔާ، ކިރަން މީޒާނުގާ އުޅުމުން

     ވެވޭ އެއްބަސް މިކަންކަމުގާ، އުޑާ ބިންހާ ފަރަގު ވާނޭ

 

އަދަބު ދިނުމާ ކުރުން އަނިޔާ، މިއީ ދެކަމެއް ޔަގީން ވިސްނާ

    ބަދަލު ކުރުމަށް މިކަންކަން ވެސް، ބަޔަކު އުޅުނަސް ނުވެސް ވާނޭ

 

ދިނުން އަނިޔާ އެއީ ގޯހެއް، ކުށެއް ކުރިޔަސް އެއީ ގޯހެއް

    ދިނުން މިއޮތީ ކުށަށް އަދަބޭ، ވުމަށް ހެޔޮ ގޮތް އަދާ ދޭނޭ