މަގާމެއްގައި ތިބޭ އެންމެން، މަކާރިމް ރީތި އަހުލާގުން

    ނަގާ ޒީނަތް ވެގެން ތިބުމީ، ކަމެއް ރަނގަޅަށް ވެދާ ކަމެކޭ

 

މަގޭ ބޮލުގާ އެޅޭ ޒިންމާ، ހަނދާން ނައްތާ ނުލާ ތިބުމީ

    މަގޭ އަބުރާއި އިއްޒަތުގާ، ގަދަރު އިތުރަށް ވެދާ ކަމެކޭ

 

ނުފޫޒާ ބާރު ބޭނުންކޮށް، މަގާމުގެ ބާރު މަތިވެރިކޮށް

    ނުފޫޒެއް ނެތް ކަމަށް ދެކިގެން، އުޅުން އެޔަކީ ބޮޑާ ކަމެކޭ

 

ކަމެއް ވާޖިބުގެ އިތުރަށް ކޮށް، ލުމީ އަމުދުން ރަނގަޅު ކަމެކޭ

    ތަމެން ހެޔޮކޮށް ތިބީ ވިއްޔާ، ހެވެއް އޭގާ ވެދާ ކަމެކޭ

 

ރަހުމު ކުލުނާއި ހިތްހެޔޮކަން، ވެދާ ހިނިތުންވުމާ އޯގާ

    ވަހުމު ޝައްކާ ފިލާދާނޭ، މިއީ ހަމަ ގައިމު ހެޔޮ ކަމެކޭ

 

ތިބޭ ވިސްނާ މިކަންކަމުގާ، އަދާކުރަމުން އެ ވާޖިބުތައް

    ލިބޭ މަންފާ ތަށާއި މަށަށް، މިއީ ހެޔޮވާނެ މޮޅު ކަމެކޭ