ވިދާ ތަރިތައް ޖަހާ ފިޔަތައް، އަނދިރި ކަޅު ރޭ ވިދާ ތަރިތައް

ފިދާވާން ވައުދު ވީ މަ އެރޭ، ހިތައް ފިނިކަން ލިބުން ވާ ރޭ

 

އަނދިރި ކަޅު ސާލު ހިތުގާ ވާ، ފަޖުރު ތަރިއެއް އަރާ ފުހެލީ

އަނދިރިކަން ހިތު ތެރޭން އެއްކޮށް، ފިލާ އަލިކަން ގެނައި ރޭރޭ

 

ހިމޭންކަން ޖައްވުގާ ވި ނާގާ، ލިއެއްލާލީ ހިތުން އޭނާ

ނިމޭނޭ ދަންވަރާ ހަނދުވަރު، އަރާ އިރު ފާޅުވީމަ އެރޭ

 

އަނދާ ބާރަަށް ދުވާ ގިނިހިލަ، ދުވާތަން ރޭގަނޑަށް ފެނެއޭ

އަނދާ އަލިފާން ގަނޑެއް ފެނުމުން، ބިރުން އޮއެވޭ އެތައް ރޭރޭ

 

ހިޔާލީ ދުނިޔެއެއް ފަދައޭ، އުޑުގަ ފިޔަތައް ޖަހާ ތަރިތައް

ކިޔާ ރާގާ ބަލާ މަންޒަރު، ދެކެން ފޫއްސެއް ނުވާ ރޭރޭ

 

އެއީ ރޭރޭ ހަނދުމަވާ ރޭ، ކިތައް ރޭ ހޭ އެއީ ބުނަމުން

ދެ އީދާ އަދި އިތުރުއީދެއް، އައުން ފަދައޭ މިބުނި ރޭރޭ