ދިވެހި އަދަބީ ބަސްތަކުގެ ތެރެއިން މިސާލުބަސްތަކަމީ މިއަދުވެސް ވަރަށް އާންމުކޮށް ބޭނުން ކުރެވޭ ބަސްތަކެކެވެ. އެގޮތުން އެފަދަ އެއް މިސާލު ބަހަކީ "ކަހާތަން ހިރުވާވެސް ނުލައޭ" ބުނާ ބަހެވެ. މިއީ އަހަރެމެންގެ ވާހަކަ ދެއްކުމުގެ ވައްޓަފާޅީގައި މިހާރުވެސް ބޭނުން ކުރެވެމުން އަންނަ އަތްމަތީ ބަހެކެވެ.

މި ބަހުގެ ބަހަވީ މާނައަށް ބަލާލާ އިރު، މި ބަހުގައި މި ބުނެވެނީ ތަނެއް ކަހާ ވާހަކައެވެ. ހަށިގަނޑުގެ ތަނެއް ކަހާ ވާހަކައެވެ. ކެހުމުގެ އިހުސާސް ކުރެވޭނަމަ، އެތަނެއް ކެހުން ނުވަތަ ހިރުވާލުމަކީ އިންސާނީ ޠަބީއަތެކެވެ. އެހެންކަމުން ކަހާ ތަނެއް ހިރުވާވެސް ނުލާ، އަޅާނުލާ ހުންނަ ހުރުމުގެ ބަހަވީ މާނައިގައި މި ބަސް ބުނެވިދާނެއެވެ.

ކަހާތަން ހިރުވާވެސް ނުލައޭ ބުނާ ބަހުގެ މިސާލީ މާނައަކީ މީހަކު ދައްކާ ވާހަކައަކަށް ނުވަތަ ވަމުންދާ ކަމަކަށް އެއްވެސް އަޅާލުމެއް، ސަމާލުކަމެއް ނުދީ އަނެކާ ކުރާ ކަންކަން ކުރަން އުޅުމެވެ. ކަންކަމާ އަޅާނުލާ، ކުރާކަމެއް ކޮށް ނިންމާ މީހުންނަށް މިހެން ބުނެ އުޅެއެވެ. މިސާލަކަށް މީހަކު މީހަކަށް ނަސޭހަތެއް ދެމުންދާއިރު، އެ ނަސޭހަތައް ސަމާލުކަމެއް ނުދީ، އަޅާނުލާ، އެ މީހަކު އުޅެމުންދާ ގޮތަކަށް އުޅެމުންދާނަމަ މި ބަސް ރައްދުކޮށް އުޅެއެވެ.