ފޮޅޭ މާތައް ފަތިހު ފިންޏަށް، މިލާ އެދަނީ އަސުރު ފަހުގާ

   ފޮޅޭ އިރުގާ އެހުރި ކުލަތައް، ފިލާ އެދަނީ މިލަން ފެށުމުން

 

އަރާ އިރު އުދަރެހުން ތޮޅިލާ، މަތިން ޖައްވުގެ ތެރޭން އެދަނީ

   އަރާ ހުރި އިރު އޮބާ އެ ލަނީ، ހިޔަނި ފަހަތައް ލަމުން އޮބަމުން

 

އަޅާ މޭވާ ޅަކޮށް ހުއްޓާ، ފަހުން ރިއްސެޔޮ ލަމުން އެދަނީ

   ފަޅާ ގަސްތައް ބޮޑެތި ވެދަނީ، ހިޔާ ފިނިކަން ބިމަށް ލިބެމުން

 

ދަގަނޑު ލަކުޑީގެ ގަދަފަކަން، ފަހުން ނެތިގޮސް ފަނާވެދަނީ

   ދަގަނޑު ދަބަރަށް ވެދާ އިރުގާ، ލަކުޑި އެދަނީ މުޅިން ފީވެން

 

ހަޔާތެއް މީ ނިކަން ކުރުކުރު، ލިބޭ އިބުރަތް އެހާ ގިނަގުނަ

   ހާޔާތުގަ ދަސްކުރަން މިޖެހޭ، އެތައް ކަންތައްތަކެއް ވާކަން

 

ޒުވާން އުމުރާ މަގޭ ޅަފުރާ، ދަނީ ފަސްދީ ބަލާ ނުމެލާ

   ޒުވާބެއް ކުރުމުގައި ހުއްޓާ، މަގޭ މިދަނީ މުޅިން ވަކިވެން

 

އެހާ ކުރު އެއްޗެކޭ އުމުރީ، އެކަން ކާކުހެ ހާނދާން މިހުރީ

   އެހާރުން އިބުރަތެއް ހާސިލް، ކުރުން ނޫނީ ނެތޭ ހެޔޮކަން