ހޯދަން ލިބޭ ގިނަގުނަ ޘަވާބް، މީ މައްސަރޭ ލިބިދޭ ޘަވާބް

   ރޯދައެ ހިފަންވީ މި މަހުގާ، ދެއްވުން އަދާ ހެޔޮ ދަރުމައިން

 

ފުއްސެވުމަށާ އަދި ދިއްނެވުން، އަދި ރަހްމަތާ ބަރަކާތް ލިބުން

   ހުއްޓާނުލާ ދެއަތާއި ހިތް، އުފުލާ ކުރާ މި ދުޢާ ތަކުން

 

ގިނައިން ޞަލާތާ ހެޔޮ ޢަމަލް، ކުރުމޭ މިމަހުގާ ގިނަކުރުން

   ގިނައިން ދިނުން ޞަދަޤާތުގާ، ބަރަކާތް އިތުރުވާ ގޮތް ވުމުން

 

ޤުރުއާނު ބާވާލެއްވި މަސް، އަދި ރޭ ވަނީ މިމަހުގެ ތެރޭ

   ޤުރުއާނު އަކުރަށް ދޭ ޘަވާބް، އިތުރުވެ ދެޔޭ މިމަހުގެ ތެރޭން

 

ދެއްވާ އަމާންކަން ރޭގަނޑަށް، ޤަދްރީގެ ރޭ ވާ ލައިލަތުލް

   އެއްހާސް އަހަރު އަޅުކަން ކުރުން، ފަދައޭ އެރޭ އަޅުކަން ކުރުން

 

ކެތްތެރި ކަމޭ އެކި ގޮތްގޮތަށް، ދަސްކޮށް ދެނީ ރަމަޟާން މަހުން

   ކެތްނުކުރުމާ ކަންނެތްވުމާ، ނެތި ކޮށްލަދޭން އައި މައްސަރުން

 

ރޭ އަޅުކަމާއި ކުރާ ޛިކުރް، އަދި ކޮށް ތަރާވީހުގެ ޞަލާތް

   ރޭގަނޑުގެ ބޮޑުބައި އަޅުކަމަށް، ހޭދައެ ކުރަންވީ ހެޔޮހިތުން

 

ފާއިތުވެގެން ދިއުމުގެ ކުރިން، ބޭނުން ހިފާށޭ މިމަހުގާ

   ފާއިތުވެ ދާނޭ ލޯމަތިން، ކުޑަ ހިނދުކޮޅެއްގެ ތެރޭ މިމަސް