ތިކިތައް ވެހޭ ވާރޭގެ ބޯ، ބިމުގާ ޖެހޭ އަޑު މިއުޒިކާ

   ހިކިފަސް ބިމަށް ތާޒާކަމާ، އާރޯ ކަމާ ގެނުވާ އެދިން

 

ޖައްވުގެ ތެރޭގައި ވާ އުދާސް، ފިލުވާލަދިން ވާރޭ ވިލާ

   ޖައްވުގެ ތެރަށް ބުރުވާލަދިން، ހިމަފޮދު ތިކިން ވާރޭ އެދިން

 

ގުގުރާ ވިދާ ހެދުމީ މަށަށް، ނިއްޖެއް އަރާމު ލިބޭ ކަމެއް

   ގުގުރާ އިރަކު ވާރޭ ވެހޭ، ބޭނުން ވެޔޭ އޮވެގެން ނިދަން

 

ވިއްސާރަޔާ އެކުގާ ވެހޭ، ގަނޑުގާ ވިލާ އަލިފާން ވުމީ

   ވިއްސާރަޔާ ހޮނުގުގުރިއާ، އަލިފާން އެއިން އުފެދޭ ގޮތުން

 

އުޑުގާ އެވާ ކަޅު ބޯ ވިލާ، ވާރޭގެ ގޮތުގާ ވެހި އެދާ

   މުޑުދާރުކަން އޭގާ ނުވާ، ބޯންވެސް އެފެން ކަމުދާ ދިއުން

 

ވިސްނާލުމުން މިކަމުން ލިބޭ، އިބުރަތް ތަކާއި ދަރުސްތަކާ

    ވިސްނާލުމުން ފެނި ހާމަވީ، އެއިލާހު ކުޅަދުން ވަންތަކަން