މިނިވަން ކަމޭ ބުނަމުން ދަރިން، ބޭނުން ކަމެއް ކުރުމަށް ރުހޭ

   މިނިމަސް ކެވޭ އިރު އެއުރެނަށް، އިހުސާސް ނުވޭ މިނިވަން ކަމުން

 

ވައްކަން ކުރަން ބޭނުން ވުމުން، އެދަރިން އެކަން ވެސް އެބަ ކުރޭ

   ފައްކާވަމުން ކުއްތައް ކުރަން، އެދަރިން ދަނީ މިނިވަން ކަމުން

 

ކުރުމަށް ޖަދަލު ބޭނުން ވުމުން، ބާރަށް ހަޅޭވެސް އެބަ ލަވާ

   ކުރުމަށް މަނާ ނުވެޔޭ އެކަން، ލިބިފާ މިވާ މިނިވަން ކަމުން

 

ހަންޖަރުތަކުން ހަމަލާ އެ ދޭން، ބޭނުން ވުމުން ހަމަލާ ދެއޭ

   މަންޒަރު ބަލަން ނޫނީ ނެތޭ، ތިބުމަށް މިއޮތް މިނިވަން ކަމުން

 

ކުރަމުން ބޮޑެތި ކުށްތައް މިތާ، އުޅުނަސް ނެތޭ ބެނެވޭކަށެއް

    ކުރުމަށް މަނާ ކަމެކޭތިއީ، ލިބިފާ މި އޮތް މިނިވަން ކަމުން

 

ޖެހުމަށް ނަގާ އަތް ހުއްޓުވަން، ހިފެހެއްޓުމެއް ވެސް ދެން ނެތޭ

   ޖެހުނަސް މަގޭ ހިތުގާ ނިކަން، ކުރެވެން ނެތީ މިނިވަން ކަމުން

 

ޙައްޤާ ނުޙައްޤާ ނެތްތަނުން، ހޯދާ ދެނީ މިނިވަން ކަމުން

   ޙައްޤާއި ބާޠިލު އޮޅިދަނީ، ހޯދާ އެދޭ މިނިވަން ކަމުން