އެކި އެކި ނަމާ އެކު ނަންދެމުން، ނަންދީ ކިޔޭ މިނިވަންކަމޭ

   އެކި އެކި ގޮތަށް އެކި ތަންތަނަށް، ފަތުރަން އުޅޭ މުޑުދާރުކަން

 

ފާހިޝްކަމާ އެކުގާ ނަޖިސް، ގުޅުމެއް އެއީ ގުޅިގެންނެ ދާ

   ދާހިތްވެޔޭ މިބިމަށް ހަރަން، އަހަރެންގެ ބޯ މި ނުބައި ކަމުން

 

ބަންޑުން އެ ޖެއްސެވި ކާރިސާ، ޕޮންޕޭގެ މީހުން ހާލުގައި

   ބަންޑުން މިތަންވެސް ޖައްސަވާ، ފާނޭ ކަމަށް ބިރުގަންނަމުން

 

އުޅުމެއްގެ ގޮތުގައި އެއުޅުމީ، ކޮންފަދަ ނަޖިސް އުޅުމެންހެ ވާ

   ގުޅުމެއްގެ ގޮތުގައި ގުޅިދަނީ، ފަކުރުން ފުރޭ މުޑުދާރުކަން

 

ދައްކަން މިވާހަކަ ނުކެރުނަސް، ދައްކަން މިއަދު މަޖުބޫރުވޭ

   ފަށްފަށްވެގެން މަންޒަރުތަކާ، އަޑުތައް އިވޭ މުޑުދާރުކަން

 

ބިރުވެތި ކަމެއް ނިކަމެތިކަމެއް، ހިތުގައި ނެތިހޭ މީސްތަކުން

   އިރު ކައިވަތެއްހާ ކައިރިއަށް، އަންނާނެ ދުވަހެއް ވާނެކަން

 

ދެއްވާށި ހެޔޮ ވިސްނުން އަދާ، ދެއްވާށި ކޮށް މި ވަޠަން އަމާން

   ހެއްދެވި އިލާހަށް ދަންނަވަން، ރޮއެފާ ދެއަތް އުފުލާލަމުން