ދިވެހި އަދަބީ ބަސްތަކުގެ ތެރެއިން މިސާލުބަސްތަކަކީ އޭގެ އަސަރު ގަދަ ބަސްތަކެކެވެ. އެގޮތުން ގުއިނުދެކޭކާޅަށްގުއިފެނުމޭ ބުނެވާ ބަހަކީވެސް އެފަދަ ބަހެކެވެ.

މި ބަހުގެ ބަހަވީ މާނައަށް ބަލާލާއިރު ގުއި މި ލަފުޒަކީ ބޮޑުކަމުތާ ތަކެތީގެ ނަޖިހަށް އެންމެ އާދައިގެ ބަހުރުވައިން ބުނެ އުޅޭ ލަފުޒެވެ. ބައެއް ހާލަތްތަކުގައި މިއީ ބޭނުންކުރަން އެންމެ އެކަށީގެންނުވާ ބަސްކަމުގައިވެސް ވެދެއެވެ. ގުއި ނުދެކޭ ކާޅަކަށް ގުއި ފެނުނު ވާހަކައެވެ. މާނައަކީ ބޮޑުކަމުދާ ތަކެތީގެ ނަޖިސް ނުދެކޭ ކާޅަކަށް އެ ނަޖިސް ފެނުނު ވާހަކައެވެ. އެހެން އެކަން ވެއްޖެނަމަ އެ ކާޅަކަށް އެކަން ވާނީ އާ ކަމަކަށެވެ.

ގުއިނުދެކޭކާޅަށްގުއިފެނުން، މިބަހުގެ މިސާލީ މާނައަކީ އެމީހަކާ އެކަށީގެންނުވާ ކަމެއް ލިބުމުން، ނުވަތަ ކުއްލިއަކަށް (ނުހައްގު) މުއްސަނދިކަމެއް ލިބުމުން، ބޮޑާވެގެންއުޅޭ މީހުނާމެދު ބުނެއުޅޭ ބަހެކެވެ. މިސާލަކަށް އާދައިގެ ދަނޑުވެރިއަކު ކުއްލިގޮތަކަށް މާލެއިން ބިމެއް ގަތުމުން، އެކަމާ އެ ދަނޑުވެރިޔާ ބޮޑާވެ އުޅޭ އުޅުމަށް، ގުއިނުދެކޭކާޅަށްގުއިފެނުނީއޭ ބުނެ އުޅެއެވެ.

މިފަދަ ކިތަންމެ "ކާޅަކަށް" މިއަދު "ގުއި" އެބަ ފެނެއެވެ. މިބަހުގައި ކާޅާއި ގުއި، މި ދެ ލަފުޒު ގެނެސްފައިވަނީ ނުހައްދުން ހޯދައިގަންނަން ކަންކަމުގެ މައްޗަށް ބޮޑާވާމީހުންގެ ދަރަޖަ ބަޔާންކޮށްދިނުމަށް ކަމަށް ބެލެވެއެވެ.