ދަނެގެން ތިމާ މާ އުޅުނަކަސް، މޮޅުކަން އެތާ ލިބިތާ ނެތޭ

   ދަނެގެން އެތާ ހާލަތު ތިމާ، ނޫޅެންޏަކާ އެންމެން ތެރޭ

 

މޮަޅު ހުނަރުތައް އެކި އުކުޅުތައް، އެނގިފާވިޔަސް އެކި ކަންކަމުން

   ކޮޅު ކޮޅު ބަލާ ހޯދާ ހަދަން، އަމުދުން އުޅޭ އެންމެން ތެރޭ

 

ހަޑިއޭ އެތާ ހަޑިކޮށް އުޅުން، މޮޅުކަން ތިމާ ދައްކާ އުޅުން

   ހަޑިވެސް ވެޔޭ ނަން ޚުދު ތިމާ، އަނގަ ހަޑިވުމުން އެންމެން ތެރޭ 

 

ދަސްކުރި ހުނަރު އަދި ޢިލްމަކާ، ބޭނުން ކުރަން ނޭނގެންޏަކާ

   ގަސްތާ ނިޔަތް އޮޅިގެން ދެޔޭ، ބަސް ބުނުމުގާ އެންމެން ތެރޭ

 

ލިބިފާވި ޢިލްމާ އަދި ހުނަރު، ބައްކޮށް ތިމާ ޖީބުގަ އޮތަސް

   ލިބިފާވި ޢިލްމުން ހެޔޮ ކަމެއް، ލިބުމެއް ނެތޭ އެންމެން ތެރޭ