ދިވެހި އަދަބީ ބަސްތަކުގެ ތެރެއިން ގިނަ މިސާލުބަސްތައް މިއަދު އަހަރެމެންނަށް ބޭނުމެއް ނުކުރެވެއެވެ. މިއީވެސް އެފަދަ މިސާލު ބަހެކެވެ. ބަހުގެ ބަހުރުވައިގެ ގޮތުން ފަހަރުގައި ދޫމައްޗަށް މިއީ ހުތުރު ލަފުޒުތަކެކޭ ހީވެދާނެއެވެ. ނަވެސް މިއީ ވަރަށްވެސް މާނަ ފުން މިސާލު ބަހެކެވެ.

ފުދުނު ބަކަރި ހެދިގެން އުޅުމޭ ބުނާ މި މިސާލު ބަހުގެ ބަހަވީ މާނައަށް ބަލާލާއިރު މި ބަހުގައި މި ބުނަނީ ފުދިގެން އުޅޭ ބަކައްޓެއްގެ ވާހަކައެވެ. ބަކައްޓަކީ އާންމު ގޮތެއްގައި ކޮށީގައި ގެންގުޅޭ ޖަނަވާރެކެވެ. އެސޮރުމެންނަށް ކާނާ ހޯދަނީ އެސޮރުމެން ގެންގުޅޭ މީހާއެވެ. ކޮއްޓަކު ކާއެއްޗެއް ނުމެ ހުންނާނެއެވެ. އެހެންކަމުން އެ ބަކައްޓަށް އޮތް ގޮތަކީ ވެރިމީހާ ދިނީމަ ކައިގެން، ނުދެންޏާ ނުކައި ހުރުމެވެ. ވީ ހާލެއްގައި ފުދިގެން ހުރުމެވެ.

މި ބަސް ބުނެ އުޅެނީ މީހަކު ހެދިހާ ގޮތަކަށް ރުހިގެން ހުންނަ ހުރުމަށެވެ. އެ މީހަކު ކޮންމެ އެއްޗެއް ބުންޏަސް އެއަށް އެއްބަސްވެ، އެ މީހަކު ކޮންމެ ކަމެއް ކޮންމެ ގޮތަކަށް ކުރިޔަސް އެކަމަކަށް ރުހިގެން ހުންނަ ހުރުމަށެވެ. އެ މީހަކު ތިމާއަށް އަނިޔާވެރިވެ ހިޔާނާތްތެތިވާ އިރުވެސް، އެ މީހަކު އެ ކުރާ ކަންކަމުގެ މައްޗަށް ރުހިގެން ހުންނަ ހުރުމަށެވެ. މި ހާލަތުގައި ފުދުނު ބަކަރި ހެދިގެން ހުންނަނީ އޭ ނުވަތަ އުޅެނީ އޭ ބުނެ އުޅެއެވެ.