ނޭނގުނޭ މަށަކަށް މިވީގޮތް، ނޭނގި ހުއްޓާ މަތި އެވީ

   ނޭނގުމެއްގައި ބޭގަރާރުވެ، ލޭ މަގޭ މަތިވެސް އެވީ

 

ނޭނގެޔޭ އިހުސާސަކުންނެއް، މަތިވެ ލޭ ގޮސް ހުންނަކަން

   ނޭނގެޔޭ ބުނެދޭކަށެއް ވެސް، ވާގޮތެއް އެނގިފާ ނުވީ

 

ނޭނގިހުއްޓާ މީ ބުނަންހޭ، މަރުގެ ހަތިޔާރެއް މިއީ

   ނޭނގިހުއްޓާ އޭ މަގޭ ހިތް، ބަލިވެގެން ގޮސް ހާންތިވީ

 

ނޭނގުނޭ ވީ އެއްގޮތެއްވެސް، ކުއްލި މަރަކުން ނިމި އެދީ

   ނޭނގުނިއްޔޭ ބުނެވުނަސްވެސް، ލޭގެ ޕުރެސަރު މަތި އެވީ

 

މަތިވުނުން ލޭ ނާރުތައްވެސް، ހަރުވެ ވާންކަން ކެނޑި ދަނީ

   މަތިވުމުން ލޭ ގޮސް މަގޭ، ހިތުގެ މަސްތައް ހަރު އެވީ

 

ބޮޑުވެޔޭ މަސްތައް މަގޭ، ހިތުގައި ވަށައިގެން ލެވި އެވާ

   ބޮޑުވުމުން ހިތުގައި އެވާ، ޖާގައިގެ ތަނަވަސް ކަން ނުވީ

 

ދައުރުވާ ދުނިޔޭގަ މީ ހުރި، ރައްކަލެއްނު މި ކަންކަމީ

   ދައުރުވާ ލޭ މިންވަރޭ ގޮސް، މަދުވެ ޕުރެސަރު މަތި އެވީ

 

އެކިތަފާތުގެ ބަލިތަކާ މަރު، ބިރު އިތުރުވޭ މަތިވުމުން

   އެކި ހިޔާލުތަކުން އަނެއްކާ، ހާސްވެގެން ކަންބޮޑު މިވީ