ގަންދީ ހުވާ ކުރަމޭ މަގޭ، ކައިވަތް އަޅާ ދީފާ މިރޭ

   ދަންވަރު ނައޭ ނިންޖެއް މަގޭ، ފަތްޖެހި ގޮނޑީގާ ފުރުޅެމުން

 

އުޑުގާ އެވާ ތަރިތައް ގުނަން، ލޮލުފިޔައަކަސް ނުޖަހަން މަށެއް

   އުޑުގާ އެވާ ކަޅު އަނދިރިކަން، އަލިކޮށްފިއޭ ދިން ހަނދުވަރުން

 

މެންދަމު ގަޑީގާ ފާޅުވީ، ހުރެ ފުޅެވިހަނދު އެ ވިލާ ތެރޭ

   ހެންހީވެޔޭ ގިނި ހިލައެކޭ، އަދި މާދުރުން ހުރެ ދިއްލެމުން

 

އައިނައިތަނެއް ހަމަ ނޭނގެޔޭ، ކަޅުބޯ ވިލާގަނޑެކޭ އައީ

    އައި ބާރުމިނުގައި އެދިޔައީ، ހަނދުވެސް އެތާ ފަރުދާވަމުން

 

ވައިވެސް ޖެހެން ފެށިއޭ ނިކަން، ބާރަށް ގަހާ ގޮފިތައް ލަނބާ

   ގައިގާ އަޅާ އޮތް މުންޑުވެސް، ވައިގާ ނަގާ އެއްލާލަމުން

 

ފަތްޖެހި ގޮނޑީގާ ދެން މަށަށް، ކެތްވާކަށެއް ވެސް ނެތް އެރޭ

    ފަތްތައް ވަޔާ އެކު ބުރުވަމުން، ކެރިވެސް ވެހެން ފެށިއޭ އަލުން

 

ތަރިތައް ގުނާ ހަނދުވެސް ބަލަން، އޮށްވާ މަގޭ އެތަނުން ނެގީ

    އަރިއަށް ޖެހެންފެށި ވައިއައިސް، ވާރޭގެ ތިކިތައް ތެއްމަމުން