ވެހޭ ވާރޭ ތެރޭ ތެމިގެން، ދުވީމޭ ފެންގަނޑަށް އެރިގެން

   ވެހޭ ވާރޭ އެހާ ބޯކޮށް، މަގާ ގެވަޅާ ފެނުން ބޮޑުކޮށް

 

ވަޔާ އެކުގާ އެއައި ކެރިގަނޑު، ރަށަށް އެ އެރީ ނިކަން ބާރަށް

   ވަޔާ އެކުގާ ކަނޑުން ރާޅާ، ލޮނާ ބުރުވާ އެކަށް ފޮނުކޮށް

 

ފުރާޅު މަތީ އެވާ ކުނިތައް، ނަގާ ކުރަމޭ ނިކަން ނަލަނަލަ

    ކުރާ މިކަނުން މިގޭ ތާނގީ، ފުރާ ފެންވެސް އަޅާ ބަރުކޮށް

 

މަހެއް ދެމަހެއް ވިޔަސް ހުސްވާން، ނުޖެހި ފެންފޮދު މިގޭން ލިބެއޭ

   ވަހެއް ރަހައެއް ނުވާ އެފެނުން، ލިބޭ ފައިދާ އެހާ ބޯކޮށް

 

މިއީ ލިބިފާވި ނިޢުމަތެކޭ، އެއަށް ޝުކުރުމެ އަދާ ކުރުމަށް

    މިއީ އޭގެން ކުރާ ރާހަތު، ރަނގަޅު ފެނެކޭ ނިކަން ބޮއުމަށް

 

މިއީ ޤުދުރަތުގެ ރިޒުޤެއްތާ، މިއީ ވާރޭ ފެނޭ ވެހިދާ

   މިއީ ލިބުމުން ޝުކުރުވެރިވާ، ނުލިބި ވުމުގާ ހިތާމަ ކުރާ