ދިވެހި އަދަބީ ބަސްތަކުގެ ތެރެއިން ރާވެރިއެއްގެ ދަރިއަކަަށްވެސް ހަތަރެތިން އެކަތި އޮންނާނެއޭ ބުނާ ބަހަކީ މުސްކުޅި ބަހެކެވެ. މިއީ އާންމުގޮތެއްގައި ބަދަލުހިފުމުގެ ރޫހުގައި ބުނެ އުޅޭ ބަހެކެވެ.

މިބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނެވެނީ ރާވެރިއެއްގެ ދަރިއެއްގެ ވާހަކައެވެ. ރާވެރިންނަކީ އޭރު އެޒަމާނަށް ބަލާއިރު، ތަންކޮޅެއް ދެރަ ބައެކެވެ. އެހެންކަމުން އެމީހުންގެ ދަރިންނީ ނިކަމެތި ބައެއް ކަމަށް ދެކި އުޅެއެވެ. އެއާއި އެކު އެފަދަ ނިކަމެތި ދަރިއަކަށްވެސް ހަތަރުބައިކޮށްފަ އެއްބައި ލިބޭނެއޭ ބުނެެެއެވެ.

މިބަހުގެ މުސްކުޅި މާނައަކީ މީހެއްގެ ނުވަތަ ބައެއްގެ ފަރާތުން ގިނަފަހަރަށް ދެރައެއް ނުވަތަ އަނިޔާއެއް ލިބެމުން ދާ މީހާ، އެ އަނިޔާއެއް ދޭ ފަރާތައް ރައްދުގައި ދެވޭ ބަދަލުހިފުމުގެ ޖަވާބެކެވެ. މިއަދު ތިމަންނާއަށް ތިހެން ހެދިޔަސް، އަދި ތިމަންނާގެ އަތަށްވެސް ބާރެއް އަރާނޭ ދުވަހެެއް އަންނާނޭކަން ހަނދާން ކޮށްދީ ބަދަލުހިފުމުގެެ ރޫހުގައި ދެވޭ ރައްދެއްގެ ގޮތުން މި ބަސް ބޭނުން ކޮށް އުޅެއެވެ. މިސާލަކަށް ސުކޫލެއްގައި ހަނގާގެ ޝިކާރައަކަށް ވެފައިވާ ކުއްޖަކު އެ ކުއްޖާއަށް ހަނގާކުރާ ކުދިންނާ ދިމާލަށް، އެ ކުދިންނަށް ބަދަލު ހިފުމުގެ ރާގެއްގައި "ރާވެރިއެެއްގެ ދަރިއަކަސް ހަތަރެތިން އެކަތި އޮންނާނެ" އޭ ބުނެވިދާނެއެވެ.