ދިވެހި އަދަބީ ބަސްތަކުގެ ތެރެއިން ނަރެއްހާތަން ދޫކޮށްލިއްޔާ ކެނބެއްހާތަން ދަމައިގަންނާނޭ ބުނާ ބަހަކީ މުސްކުޅި ބަހެކެވެ. މިއީ މިއަދު ގާނޫނީ ދާއިރާގައި މަސައްކަތް ކުރާ ގިނަ ބަޔަކަށް ވަރަށް ގިނައިން ނިސްބަތް ކުރެވިދާނޭ ބަހެކެވެ. ނަމަވެސް ހިތާމަ އަކީ އެވެރިންނަށްވެސް މިފަދަ ބަސްބަސް ބީރައްޓެހިކަމެވެ.

މި ބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނަނީ ނަރެއްގެ ވާހަކަ އާއި ކެނބެއްގެ ވާހަކައެވެ. ނަރު ނިސްބަތް ކުރަނީ ވަލުގެ އެއްމެ ހިމަ ބާވަތަށެވެ. ކެނބު ބޭނުން ކުރަނީ ވަލުގެ އެއްމެ ބޯ ނުބަތަ ބޮޑެތި ވައްތަރަށެވެ. ނަރެއްފަދަ ހިމަ ނުވަތަ ކުޑަ ދުލެއް ދިން ނަމަވެސް ދަމަން ތިބޭ މީހުން ކެންބެއްހާތަން ނުވަތަ ބޮޑުކޮށް އެ ދުލުން ދަމައިގަންނާނެއެވެ. 

މި ބަހުގެ މުސްކުޅި މާނަ އަކީ ގާނޫނުތަކުން ނުވަތަ ގަވާއިދުތަކުން މީހަކަށް ނުވަތަ ބަޔަކަށް، ކިތައްމެ ކުޑަ ނަމަވެސް ލުޔެއް ދެވިއްޖެ ނަމަ، އެ މީހަކު ނުވަތަ އެ ބަޔަކު އެ ލުއީގެ ބޭނުން ކޮށްގެން ނަގަން ނުވާ މިންވަރެއްގެ ބޮޑު ފައިދާއެއް ނަގާނޭ ބުނުމުގެ މާނާގައެވެ. މިފަދަ ފައިދާތައް ގިނަފަހަރަށް ވެފައިވަނީ ނާޖާއިޒް ފައިދާތަކަށެވެ. އެހެން ކަމުން މިފަދައިން ގަވާއިދުތަކުން ދެވޭ ކުދި ކުދި ލުއި ލުއީގައި އެ ލުއި ރައްދުވާ ބަޔަކު، އެ ލުޔަކާއި ނުބައްދަލު ފައިދާއެއް ނަގާ ހޯދާ ކަމުގައި ވަނީނަމަ "ނަރެއްހާތަން ދޫކޮށްލުމުން ކެނބެއްހާތަން ދަމައިގަތީއޭ" ވެސް ބުނެވިދާނެއެވެ.