ވަޅު ޖެހުނު ބިމުގާ ކުޑަ އޮށެއް، އެތަކެއް ވެޔޭ ސިއްރެއް އެކީ

    ބަޅު ކޮށްވިޔަސް ތެދުކޮށް ވިޔަސް، ހެދިދާނެ ގޮތްވެސް އެބަ ވެޔޭ

 

ގަހުގާ ފަޅާ ގޮފިތައް ފަތާ، އެ އޮށުގެ ތެރޭގައި ލިޔެވިފާ

   ވަހުމާއި ޝައްކެއް މިކަމިގާ، ނުކުރުން މިތާ ހެޔޮ ވެސް ވެޔޭ

 

ގަހުގާ ފޮޅޭނެ މަލާއި ފިޔަ، އެމަލުން ދުވާ އެކި ވަސްވަހާ

   ގަހުގާ ފޮޅޭ މާތަކުގަ ވާ، ފިޔަތަކުގެ ކުލަ ވެސް އަދު ވެޔޭ

 

ގަހުގާ އަޅާ މޭވާ ތަކާ، މޭވާގެ ރަހަޔާ ކުލަ ތަކާ

   ވަހުގާ އެވާ ފޮނި މީރުކަން، ވެސް ލިޔެވިފާ އެ އޮށުގަ ވެޔޭ

 

މަދަދުން އިލާހީ އައި މިއީ، ކުޅަދުން އިލާހުގެ ޤުދުރަތޭ

   އަދަދާއި އަދަދުގެ ސައްހަކަން، އަދި އުމުރު އެގަހުގެ ވެސް ވެޔޭ