ދިވެހި އަދަބީބަސްތަކުގެ ތެރެއިން، ނެގޭނީ ދީފައި އޮތް ބަނޑު ހަނޑުލެކޭ ބުނާ ބަހަކީ މުސްކުޅި ބަހެކެވެ. މިއީ އަދުގެ މި ސިޔާސީ ހަލަބޮލިކަމުގައި ވަރަށް ގިނައިން ބޭނުން ކުރެވިދާނެ ބަހެކެވެ.

މި ބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނެވެނީ މީހަކަށް ލިބޭ ނުވަތަ ދެވޭ އެއްޗެއް ނަގާ ވާހަކައެވެ. އިހުގައި ބަނޑު ހަނޑުލަކީ ކުރާ މަސައްކަތަށް އުޖޫރައިގެ ގޮތުގާ ދީ އުޅޭ އެއްޗެކެވެ. އެހެންކަމުން މި ބަހުގައި މި ބުނަނީ މީހެއްގެ ފަރާތުން އެހެން މީހަކަށް ދެވޭނެ ގެއްލުމަކީ ހަމަ އެކަނި އެ ބަނޑު ހަނޑޫކޮޅު ނެގުން ކަމުގައެވެ.

މި ބަހުގެ އަދަބީ މާނައަކީ މީހަކަށް ދެރައެއް ދިނުމުގެ ގޮތުން ނުވަތަ ގެއްލުމެއް ދިނުމުގެ ގޮތުން ވިޔަސް ކުރެވޭނެހާވެސް ކަމަކީ އެމީހެއްގެ ފަރާތުން މީހަކަށް ދެމުންދާ ހިދުމަތެއް ހުއްޓާލުމެވެ. ނުވަތަ އެމީހެއްގެ ވަޒީފާއިން އެ މީހަކު ވަކި ކުރުމެވެ. މިގޮތަށް މިކަން ކުރި ނަމަވެސް އެމީހަށް ދެން ލިބެންހުރި ނިޢުމަތްތަކަކުން އެމީހަކު މަހުރޫމު ނުކުރެވޭނެއެވެ.

އާންމުކޮށް މި ބަސް ބޭނުން ކޮށް އުޅެނީ މީހެއްގެ ފަރާތުބް ދެރައެއް ލިބެން އުޅޭކަން އެނގުމުން، އެކަމުގައި ތިމާގެ ސާބިތުކަން ހާމަކުރުމުގެ ގޮތުންނެވެ. ނުވަތަ އެފަދަ ހާލަތެއް ކުރިމަތިވެފައިވާ މީހަކަށް ހަމަޖެހުން ގެނެސްދިނުމަށް ނުވަތަ ހިތްވަރެއް ދިނުމުގެ ގޮތުންވެސް މި ބަސް ބުނެ އުޅެއެވެ. ވަޒީފާގެ ބިރު ދައްކާ ފަރާތްތަކުގެ ކުރިމަތީގައި ހިތްވަރާއި އެކު ސާބިތުވުމުގެ ގޮތުންވެސް މި ބަސް ބޭނުން ކޮށް އުޅެއެވެ.