ދިވެހި އަދަބީބަސްތަކުގެ ތެރެއިން ރޯހަމެއްނުފެޅޭނެ އޭ ބުނާ ބަހަކީ މުސްކުޅި ބަހެކެވެ. މިއީ އާންމުކޮށް ކެއުމަށް ލޯބިކުރާ މީހުންގެތެރެއިން ވަކި ހާއްސަ ބަޔަކަށް ހާއްސަކޮށް ރަށްދު ކުރެވޭ ބަހެކެވެ.

މިބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނަނީ ރޯ ހަމެއްގެ ވާހަކައެވެ. ނިސްބަތްކުރެވެނީ އިންސާނާގެ ހަށިގަނޑުގެ ހަމަށެވެ. އޭގެ ޠަބީއަތުގައި އިންސާނާގެ ހަށިގަނޑުގެ ހަންގަނޑަކީ އެބުނާ އުސޫލުން ފަޅައިގެން ދާނޭ ގުނަވަނެއް ނޫނެވެ.

މިބަހުގެ މުސްކުޅި މާނަ ނިސްބަތް ކުރެވެނީ ގިނައިން ކެއުމަށް ހިތްވަރުދިނުމުގެ ގޮތުންނެވެ. ނުވަތަ ހިތްވަރު ލިބިގަތުމުގެ ގޮތުންނެވެ. އެހެނީ އެހާލަތުގައި މި ބަސް ރައްދު ކުރަނީ ބަނޑަށެވެ. ބަނޑުގައި އޮންނަނީ ރޯ ހަންގަނޑެއް ކަމުން، ކިތައްމެ ގިނައިން ކޭނަމަވެސް އެ ހަންގަނޑު ފަޅައިގެން ގޮސް، ބަނޑު ފަޅައިގެން ނުދާނޭ ވާހަކަ ބުނުމަށެވެ. އަދި މިއީ ގިނައިން ކެއުމުގެ ގޮތުން، އެކަމާ ދެރަނުވާން ބުނެއުޅޭ ބަހެކެވެ.