ދިވެހި އަދަބީ ބަސްތަކުގެ ތެރެއިން، ބަރާ އޮޑިއަކަށް ބިސްމިވެސް ބަރުވާނޭ ބުނާ ބަހަކީ މުސްކުޅި ބަހެކެވެ. މިއީ އަދުގެ ގިނަ ހާލަތްތަކުގައިވެސް ބޭނުން ކުރެވިދާނެ ބަހެކެވެ.

މި ބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނަނީ ބަރާ އޮޑިއެއްގެ ވާހަކައެވެ. އެއީ ބަރުކޮށްގައި އޮންނަ އޮޑިއެއް ނުވަތަ ދޯންޏެއްގެ ވާހަކައެވެ. ދެން ބުނެވެނީ ބިސްމި ގެ ވާހައެކެވެ. ބަރުކޮށްފާ އެ އޮތް އޮޑިއަށް ބިސްމިވެސް ވާނީ ބަރު އެއްޗެއް ކަމުގައެވެ. އެހެނީ ބަރުކަމުން އެ އޮޑިއަށް އެއްޗެއް ނާރުވާން ހުރި މީހަކު، އޭގައި ހުރި މީހަކު ބިސްމިފަދަ ކަލިމައެއް ކިޔަސް އެ އޮޑިއަށް ބަރުވާނޭ ކަމަށް ދެކޭނެކަމުގައި ވުމެވެ.

މި ބަހުގެ މުސްކުޅި މާނާގައި ދެ މާނައެއް ވާކަމަށް ބުނެވެއެވެ. އެއް މާނައަކީ ހަމަ ބަހަވީ މާނައިގައިވެސް އެވާ މާނައެވެ. ބަރުކޮށްފައި އޮތް އޮޑިއަކަށް ކިތައްމެ ކުޑަ ނަމަވެސް އެއްޗެއް އެރުވިޔަސް ވާނީ ހަމަ ބަރު ބޮޑު ކަމުގައެވެ. ދެވަނަ މާނައަކީ މީހަކު ނުކުރާން ހިފައިފި ކަމެއް، އެމީހަކު ލައްވާ ކުރެވޭނޭ ގޮތެއް ނޯންނާނެ ކަމަށެވެ. އެމީހަކު ކައިރި ކިތައްމެ އާދޭހެއް ކުރިނަމަވެސް އެއީ ހަމަ ބޮޑުކަމެއް ކަމުގައި ދެކި އެމީހަކު އެކަން ނުކުރާނެ ކަމެވެ.

އާންމު ގޮތެއްގައި މި ބަސް ބޭނުން ކުރެވެނީ ހަމަ ބަހަވީ މާނައިގައި އެ އޮތް ގޮތަށެވެ. އާދެ! ބަރާ އޮޑިއަކަށް ބިސްމިވެސް ބަރުވާނެއެވެ!