އައީ ދައްކަން ޓަރަށް ޑަކްޓަރު، ރަށުން ދެއްކެން އެތާ ނެތުމުން

   އައީ ކުރިއަށް މެމޯ ނަގަމުން، ބަލާ ގަޑިވެސް އޮޅުން ފިލުވިން

 

އައިސް ހަމަ ފޭބުމާ އެކުގާ، ގުޅާފާ ބުނި ބަހުން ދެރަވީ

    ނައިސް ރަށުގާ ހުރުން ރަނގަޅޭ، ހިތަށް މަ އެރީ އެބުނި ބުނުމުން

 

ޖަހާ ރާޅުގެ ތެރޭ ތަޅަމުން، އެވާ ގަދަ ކަނޑު ހުރަސް ކޮށްފާ

   އެހާ ބޮޑުކޮށް ހަރަދު ކޮށްފާ، އައީމާ ދެން އެހެން ބުނުމުން

 

ވަރަށް ދެރައޭ މިވީ ގޮތަކުން، ކޮޓަރިއަށް ގޮސް އެހާ ވިސްނިން

     ހަރަށް ވަދެފާ ނުކުމެދާކަށް، ނެތޭ ދެން އެއް ތަނެސް އަމުދުން

 

އެހާ ބޮޑުކޮށް އެގޭ ކުއްޔާ، ކެއުން ބުއިމާ އެނޫން ހަރަދާ

   އެހާ ދުވަހަށް ކުރަން މަޑުވެސް، ޖެހުނު އިރުގާ މަގޭ ކުރަމުން

 

އަބަދު ވޮލެޓަށް ނުވަތަ ކާޑަށް، ބަލަން ޖެހޭ މިހެން ވީމާ

    އަދަބު ލިބިފާ ހުރުން ފަދައޭ، މިހެން މާލޭ ތެރޭ ހުރުމުން

 

މިއީ ރަށްރަށު އުޅޭ ބަޔަކަށް، ލިބޭ ޒާތެއްގެ އަދު ވޭނެއް

   މިއީ ކުޑަކޮށް ވިޔަސް އިސްލާހު، ވާން އެދެވޭނެ މީ ކަމެކޭ