ދިވެހި އަދަބީބަސްތަކުގެ ތެރެއިން ކައިފި އެއްޗަކާ ބޭރިވެސް ނުމޮށޭނެ އޭ ބުނާ ބަހަކީ މުސްކުޅި ބަހެކެވެ. މިއީ މިއަދުވެސް ވަރަށް އާއްމުކޮށް އަހަރެމެންނަށް ބޭނުން ކުރެވިދާނެ ރީތި ބަހެކެވެ.

މިބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނެވެނީ އެއްޗެއް ކޭ ވާހަކައެވެ. ދެން މި ބުނެވެނީ އެ އެއްޗަކާ ބޭރިވެސް ނުމޮށޭ ވާހަކައެވެ. ބޭރި ނިސްބަތް ކުރެވެނީ ޖިންނި ނުވަތަ ބިރުވެރި ސިފައެއްގައި ހުންނަ އިންސާނުންގެ މަސް ކައި އުޅޭ ހިޔާލީ އެއްޗަކަށެވެ. ކުޑަކުދިން ބިރު ދެއްކުމުގެ ގޮތުން ބޭރި އަންނާނޭ، ބޭރި އައިސް ކޮށްކޮ ކާލާނޭ ފަދަ ބަސްބަސް ބުނެ އުޅެއެވެ. މޮށުމޭ މިބުނާ ވާހަކަ އަކީ އެ ކޭ އެއްޗެއްގެ ވާހަކަ ދެއްކުމެވެ. އެހެންކަމުން، މިސާލަކަށް އެ ބޭރިވެސް މީހަކު ނުވަތަ ކުއްޖަކު ކާލާފާ، ތިމަންނާ އެ ކުއްޖާ ކާލައިފީމޭ ކިޔާ އެވާހަކަ ނުދައްކާނޭ ބުނާ ބުނުމަށް މިބަހުގެ ބަހަވީ މާނަ ރައްދުކުރެވިދާނެއެވެ.

މިބަހުގެ މުސްކުޅި މާނަވެސް ރައްދު ކުރެވެނީ ދާދި އެއް މާނައެއްގައެވެ. އެއީ އަހަރެމެން ތަނަކުން ކައިފި އެއްޗެއްގެ ވާހަކަ ފަހުން އަހަރެމެން ނުދައްކާނަމޭ ބުނުމުގެ މާނާގައެވެ. މިސާލަކަށް ހޮޓަލަކަށް ގޮސް އެއްޗެއް ކައިގެން އައިސް، އެހެން މީހަކު ތިބާ ކެއީ ކޮން އެއްޗެއްތޯ އެހުމުން، ޖަވާބު ނުދޭން ވެގެން، ނުވަތަ ކޭ އެއްޗެއްގެ ނަން ނުބުނާން ވެގެން ކައިފިއެއްޗަކާ ބޭރިވެސް ނުމޮށޭނޭ ބުނެ އުޅެއެވެ. 

މިބަސް ބޭނުން ކުރެވިދާނެ އަނެއް ހާލަތަކީ ތަނަކުން ވަގަށް އެއްޗެއް ކެއުމަށްފަހު، އެކަމުގައި ބައިވެރިވި އަނެކާ އެވާހަކަ އެހެންމީހެއްގެ ގާތުގައި ދައްކަފާނެ ކަމަށްޓަކައި އަނެކާގެ ސަމާލުކަމަށް އެވާހަކަ ނުދެއްކުން ގެނައުމަށް، ކައިފިއެއްޗަކާ ބޭރިވެސް ނުމޮށޭނޭ ބުނެ އުޅެއެވެ.