ދިވެހި އަދަބީބަސްތަކުގެ ތެރެއިން، އާލާތްނެތި ކެޔޮޅެއް ނުވާނޭ ބުނާ ބަހަކީ، މުސްކުޅި މިސާލު ބަހެކެވެ. މިއީ އަދުވެސް ވަރަށް އާއްމުކޮށް ބޭނުންކުރެވިދާނެ މިސާލު ބަހެކެވެ.

މިބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނެވެނީ، ކެޔޮޅެއް ކެޔޮޅަކަށް ވުމަށް، ކެޔޮޅުކަން ކުރަން ގެންގުޅޭ އާލާތްތަކާއި ސާމާނުތައް ބޭނުންވާނެ ވާހަކައެވެ. އެ އާލާތްތަކާއި ސާމާނުތަކާއި ނުލާ ކެޔޮކު ކެޔޮޅަކަށް ނުވާނެއެވެ. އެހެނީ ކެޔޮޅުކަންކުރާ އާލާތްތަކާއި ވަސީލަތްތައް ނެތްނަމަ، އެއްކަހަލ ކެޔޮޅޭ ކިޔުނު މީހާއަށްވެސް ކެޔޮޅުކަން ނުކުރެވޭނެތީއެވެ.

މިބަހުގެ މުސްކުޅި މިސާލަކީ މަސައްކަތަށް ކިތަންމެ މޮޅުމީހެއް ކަމުގައިވިޔަސް އެމަސައްކަތެއްގެ އާލާތްނެތި އެމީހަކަށް އެކަމެއް ނުކުރެވޭނެކަން އެންގުމަށް ބުނާ މިސާލެވެ. ނުވަތަ ކަމެއްކުރަން މީހަކު ކުރިމަތިލާއިރު، އެކަމުގެ ހުނަރާއި ތަޖުރިބާ އަދި ޢިލްމު ނެތްނަމަވެސް އެމީހަކަށް އެކަމެއް ނުކުރެވޭނޭކަން ހާމަކޮށްދީ ބުނެދިނުމުގެ ގޮތުން މި މުސްކުޅި މިސާލުބަސް ބޭނުން ކުރެވިދާނެއެވެ.

މިސާލަކަށް ވަޑާންކުރުމުގެ އެއްވެސް ފަންނެއް ހުނަރެއް ނެތް މީހަކު، ވަޑާންކުރަން އުޅުމުން އަލާތްނެތި ކެޔޮޅެން ނުވާނޭ ބުނެވިދާނެއެވެ. ނުވަތަ ކަމެއް ކުރަން ގަސްތުކޮށް، އެކަމެއްގެ މޭސްތިރިއަކު އަދި ހޯދިޔަސް، އޭނާ މަސައްކަތްކުރާނޭ ސާމާނު ނެތިއްޔާ، އެ މީހަކަށް އެ މަސައްކަތެއް ނުކުރެވޭނޭ ބުނަންވެސް، އާލާތްނެތި ކެޔޮޅެއް ނުވާނޭ ބުނެވިދާނެއެވެ.