ދިވެހި އަދަބީބަސްތަކުގެ ތެރެއިން ވަރުލައިގަންނަންޏާ ބޮޑު އިހާ ޖަހާނޭ ބުނާ ބަހަކީ މުސްކުޅި ބަހެކެވެ. މިއީ މަސައްކަތްތަކުގެ މާހައުލުގައި ބުނެ އުޅޭ ބަހެކެވެ.

މިބަހުގެ ބަހަވީ މާނައަށް ބަލާލާއިރު، މިބަހުގައި މި ބުނެވެނީ ރުށްރުކުގައި އަޅާ އިހަލުގެ ވާހަކައެވެ.

ވަރުލައިގަތުމޭ ބުނެވޭ ބަހުގެ މާނައަކީ މޭވާ އަޅާ ގަސްގަހުގައި މޭވާ އެޅުން މަދުވެ ހުއްޓުމަށްފަހު، އަނެއްލާ އަލުން މޭވާ އަޅާ ދުވަސްވަރު ވަނުމުން ބުނެ އުޅޭ ބަހެކެވެ. މި ދުވަސްކޮޅު ރުށްރުކުގައި ޖަހާ އިހާތަށް ބޮޑުވެފައި ވަރުގަދަވާނެއެވެ.

މިބަހުގެ މުސްކުޅި މާނައަކީ ހިނގަހިނގާ ހުރި ކަމެއް ނުވަތަ މަސައްކަތެއް ހުއްޓިލައިފައި ހުރުމަށްފަހު އަނެއްކާ ފެށޭއިރު އިހަށްވުރެ ރަނގަޅަށް، ކުރިއަށް ހިނގާގޮތް ވުމެވެ. އެފަދަ ހާލަތްތަކުގައި މި މިސާލުބަސް ބޭނުން ކޮށް އުޅެއެވެ.

މިސާލަކަށް ބަޔަކު ގަވައިދުން އިންތިޒާމުކޮށް ބާއްވަމުން މުބާރާތެއް ހުއްޓިފައި އޮތުމަށްފަހު ދެން އަލުން އެ މުބާރާތް ބާއްވާއިރު، މާ ފުރިހަމައަށް މާ ވަރުގަދަކޮށް އެ މުބާރާތެއް ބޭއްވިއްޖެނަމަ ވަރުލައިގަންނަންޏާ ބޮޑު އިހާ ޖަހާނޭ ބުނެވިދާނެއެވެ.