ދިވެހި އަދަބީބަސްތަކުގެ ތެރެއިން ފޮނު ޖަހަންޏާ ކުރަންގަށް ކަމުދާނޭ ބުނާ ބަހަކީ މިސާލު ބަހެކެވެ. ބަހަވީ ގޮތުންނާއި ބަހުގެ މާނާއިގެ ގޮތުން މިއީ މޮޅު ބަހެކެވެ. އަދި އަހަރެމެންގެ މިއަދުގެ ދިރިއުޅުމުގައި ބޭނުންކުރަންވެސް މިއީ މޮޅު ބަހެކެވެ.

މި ބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނަނީ ފޮނު ޖަހާ ވާހަކައެވެ. ދެން ބުނެވެނީ ކުރަނގި ނަމަކަށް ކިޔާ ދޫންޏެއްގެ ވާހަކައެވެ. ކުރަންގަކީ އައިންމަތީ ދޫންޏެކެވެ. އެހެންކަމުން މަސްއައިނެއްގައި ފޮނު ޖަހާފައި ހުންނަ ނަމަ ކުރަނތްގަށް އަޅައިގަންނަނީ އެ ފޮނުގަނޑެވެ. އެހެންކަމުން އެ ފޮނުގަނޑާ ދިމާލަށް އެސޮރު ތިރިކޮށް ހަދައެވެ. މިގޮތަށް މަސް އައިނެއް ނޫންނަމަވެސް ކަނޑުގައި މިގޮތަށް ފޮނު ފެންނަން ހުރެއްޖެނަމަ، ކުރަނގި އެ ދިމާލަކަށް ތިރިކޮށް ހަދައެވެ. މަސް އައިނަށް ވުރެ ކުރަނގި ޝައުގުވަނީ އެ އައިނުގައި ހުންނަ ފޮނުގަނޑަށެވެ.

މިބަހުގެ މިސާލީ މާނައަކީ ނުލިބުނަސް ލޮލަށް ފެންނަންޏާ ކަމުދާނޭ ބުނާ މާނައެވެ. އާއްމުކޮށް މިހެން ބުނެ އުޅެނީ ހިތާވެގެން އުޅޭ އަންހެން ކުއްޖާ ނުލިބުނަސް، އެކުއްޖާ ފެންނަންޏާ ކަމުދާނޭ ބުނާބުނުމަށެވެ.