ދިވެހި އަދަބީބަސްތަކުގެ ތެރެއިން ވަޑިންގެ ގެއަކު ދޮރެއް ނުހުންނާނޭ ބުނާ ބަހަކީ މުސްކުޅި ބަހެކެވެ. މި ބަހުގައި ފުން މާނައެެއް އެކުލެވިގެންވާއިރު، މިއީ ލިޔުންތެރިކަމާއި ވާހަކަދެއްކުމުގައި ބޭނުންކުރަން ރަނގަޅު ބަހެކެވެ.

މިބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނެވެނީ ވަޑިއެއްގެ ވާހަކައެވެ. އެ ވަޑި މީހާގެ ގޭގައި ދޮރެއް ނުހުންނަ ވާހަކައެވެ. ވަޑިންނަކީ ލަކުޑިން ތަފާތު ތަކެތި އުފައްދާ ބައެކެވެ. ދޮރަކީވެސް މިގޮތަށް އުފައްދާ އެއްޗެކެވެ. އެހެންކަމުން ވަޑި މީހާގެ ގޭގައި ވަޑި މީހާ އުފައްދާ އެއްޗެއް (ދޮރެއް) ނުހުންނާނެއޭ މި ބަހުގައި ބުނެއެވެ.

މި ބަހުގެ މުސްކުޅި މާނަ ރައްދު ކުރެވެނީ މަސައްކަތް ތެރީން، އަމިއްލަގޭގައި ކުރަންޖެހޭ ހަމަ އެރޮނގުގެ މަސައްކަތް ނުނިމި ފަސްވެފައި ހުންނަ ހުރުމަށް ބުނެ އުޅޭ ބަހެއް. އެގޮތުން މި ބަހުގެ ހަމައިން މިސާލު ބުނާނަމަ، ވަޑި މީހާގެ ގޭގައި ދޮރު ނުހުންނަނީ ވަޑި މީހާ އެހެން މީސް މީހުންގެ ގޭގޭގެ ދޮރުތައް ޖަހައިދޭން އުޅޭތީއެވެ. ތިމާގެ އަމިއްލަ ކަންކަން ބަހައްޓާފައިވެސް އެހެންމީހުންގެ ކަންކަން ކޮށްދޭ ދިނުމަށްވެސް މި ބަސް ރައްދު ކުރެވިދާނެއެވެ.