ދިވެހި އަދަބީ ބަސްތަކުގެ ތެރެއިން ފަންޑިތަ ހުސްވެފައިހުރި އެދުރުބޭކަލެކޭ ބުނާ ބަހަކީ މިސާލު ބަހެކެވެ. މިއީ އިބާރާތުގެ ގޮތުން ރީތި ލަފުޒުތަކެއް އެތުރިފައިވާ ރީތި ބަހެކެވެ.

މި ބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނަނީ އެދުރުބެއެއްގެ ވާހަކައެވެ. އެ އެދުރުބެއަކީ ފަންޑިތަ ކިޔަވާ އުޅޭ އެދުރުބެއެކެވެ. ނަމަވެސް މިހާލަތުގައި އެ އެދުރުބޭގެ އަތަކު ހަދާނޭ ފަންޑިތައެއް ނެތެވެ. ހުރިހާ ފަންޑިތައެއް ހަދާ ބޭކާރުވެ، ދެން އިތުރަށް ހަދާނޭ ފަންޑިތައެއް ނެތިފައި ހުރި ވާހަކައެވެ.

މިބަހުގެ މިސާލީ މާނައަކީ ގޮތް ހުސްވެފައި ހުންނަ ހުރުމެވެ. ނަމަވެސް މި ބަސް ރައްދު ކުރަނީ ގިނަ މަސައްކަތްތަކެއް ކުރުމަށްފަހު، ނާކާމިޔާބުވެ ގޮތް ހުސްވެފައިވާ މީހަކާއި ދިމާލަށެވެ. މަސައްކަތެއް ކުރުމަކާއި ނުލާ ގޮތް ހުސްވެގެން އުޅޭ މީހަކަށް އަދި މި ބަސް އަމާޒެއް ނުކުރެވެއެވެ.

މިސާލަކަށް ލޯނެއް ހޯދުމަށް އެއް ބޭންކަށް ގޮސް އަނެއް ބޭންކަށް ގޮސް އެހެން އުޅި އުޅިވެސް އެ ލޯނު ލިބޭ ގޮތް ނުވުމުން މި ބަސް ބުނެވިދާނެއެވެ. އެފަދަ މީހަކާއި ދިމާލަށް ތިއުޅެނީ ފަންޑިތަ ހުސްވެފައިހުރި އެދުރުބޭކަލެއްހެން ތާއޭ ބުނެވިދާނެއެވެ!