ދުނިޔޭގެ މީ ހަޔާތޭ، ވަގުތީ މިއީ އަރާމޭ

  އުނިކަންތަކުން ވަށާލާ، ޝަކުވާ ކުރަން ޖެހޭނޭ

 

މިތަނަށްޓަކާ ތިބާގޮސް، ހުސްވަން ވެދާނެހޭ ހެޔޮ

   މިތަނުން އަރާމު އުފަލާ، އަބަދަށް އެދެން ނުވާނޭ

 

އަގުކޮށްބަލާ މިދުނިޔޭން، އަގުބޮޑު ޖަވާހިރެއްވެސް

   އަގުއޭގެ ބޮޑުވިޔަސްވެސް، ސަންދޯކުގާ ނުވާނޭ

 

އުސްކޮށް ނަގާ އިމާރާތް، ގެދޮރާ މުދާ ޖަމާކޮށް

  ހުސްބިންތަކާއި ދަނޑުފަގު، ތަކަކުން ނަފާ ނުވާނޭ

 

ބަނދެގެން އުޅޭ މިއޮޑިތަށް، ގިނަޔަސް ކިތަންމެ ކަނޑުގާ

   ބަނދެެެގެން ކަފުނު ތެރޭގާ، ލާހިކު ނުގެންދެވޭނޭ

 

ކަންކަން މިތާ ކުރާއިރު، މަރުވާނެކަން އެނގޭހޭ

  ކަންކަން މިތާ ކުރަންވީ، ވިސްނާފަ މަރުމަތިންނޭ

 

މުދަލުން ނެރޭ ޒަކާތާ، ކުރެވޭ މި ހޭދަތަކަކީ

   މުދަލުން ކުރާނެފައިދާ، ސަންދޯކުގާ ދެކޭނޭ

 

ގެދޮރާ ބިމާއި އޮޑިތައް، އެމަގުން ކުރާށެ ބޭނުން

   ގެދޮރެއް ނުވާ އެދުވަހުން، ފައިދާ ނިކަން ކުރާނޭ

 

ހަމަ ކޮންމެ ނޭވައެއްވެސް، ލާންވީ ހެވެއް އަދައިގެން

   ހަމަގައިމު މަރު މިތާ އައިސް، ބައްދަލު ނުކޮށް ނުދާނޭ