ދިވެހި އަދަބީ ބަސްތަކުގެ ތެރެއިން ފުނަ ނުޖަހާ ބެރަކަށް ނެށުމޭ ބުނާ ބަހަކީ މުސްކުޅި ބަހެކެވެ. މިއީ ދިވެހި ސަގާފީ ހަރަކާތެއް ކަމަަށްވާ ބޮޑު ބެރުގެ ކުޅިވަރުގެ ތެރެއިން އުފަން ކުރެވިފައިވާ ބަހެކެވެ.

މިބަހުގެ ބަހަވީ މާނައަށް ބަލާލާއިރު، ފުނަ ޖެހުމަކީ ބެރު ޖަހާއިރު، އާއްމު ހަމައަށްވުރެ، ހަމަ ތަފާތުކޮށް އަވަސްކޮށް ޖަހާ ބެރެކެވެ. ފުނައިގެ ހަމައަށް ނަށާ މީހުންގެ ނެށުންވެސް ބަދަލުކޮށްލާނެއެވެ. ފުނަ އާއި އެއްވަރަށް ނެށުން ބަދަކުކޮށްލާ ކޮށްލުމަކީ އޭގައި ފޯރި ހުންނަ ކަމެކެވެ. އެހެންކަމުން ފުނަ ނުޖަހާ ބެރަކަށް ނަށާނަމަ ނަށާނީ ނަށާ އެއްގޮތަކަށް އެއްވާމެއްގައެވެ.

މިބަހުގެ މުސްކުޅި މާނައަށް ބަލާލާނަމަ، މި ބަހުގައި މި ބުނެވެނީ އެއްޗެއް ނުލިބޭ ކަމެއްގައި ބައިވެރިވެ އުޅޭ ވާހަކައެވެ. ނުވަތަ ފޯރިއެއް ނެތް މަސައްކަތެއް ކުރާ ވާހަކައެވެ. ބައެއް މީހުން އެމީހުނަށް ނުވާ ނުވަތަ އެމީހަކަށް އެކަމަކުން އެއްވެސް މަންފާއެއް ނުވާ ކަމެއްގައި މަޖޫބުރުކަމެއް މެދުވެރިވެގެން ބައިވެރިވެ އުޅޭނަމަވެސް މި ބަސް ބުނެ އުޅެއެވެ. އަދި ބައެއްފަހަރު ކުރާ މަސައްކަތްތަކުގައި އެއްވެސް ދިރުމެއް، ފޯރިއެއް، ޖޯޝެއް ނެތުމުންވެސް ތިޔަ ތިވެނީ ފުނަ ނުޖަހާ ބެރަކަށް ނަށަންހޭ ބުނެ އުޅެއެވެ.