އަހަރެންގެ ދިރުމާ ވިންދަކީ، މޭގާ އެވާ ކުޑަކުޑަ ހިތޭ

  އަހަމޭ އެ ހިތް ތެޅިލާ އަޑާ، ރޯލާ އަޑޭ ގިސްލާ ހިނދުން

 

ހިމަ ނާރުތައް ހިތުގައި އެވާ، ފަލަ ނާރުތައް ގުޅިވާ އެވާ

   ހިމަކަމުގެ މައްޗަށް ގަދަވެފާ، އަފިތައް ޖަހާ ފެތުރޭ ގޮތުން

 

ހަށިގަނޑުގެ މައްޗާ ތިރިއަށާ، އެފަރާތަށާ މިފަރާތަށާ

   ހަށިގަނޑު ތެރޭ ލޭ ދައުރުކޮށް، ފޮނުވާލަދޭ މޮޅުގޮތް ގޮތުން

 

ބެހިގެން އެވާ ބައި ހަތަރުބައި، ހިތުގައި ވެޔޭ މާ ރީތިކޮށް

   ބެހިގެން އެދާ ލޭތައް އެތާ، ތަރުތީބަކުން ބެހިދާ ގޮތުން

 

ތެޅުމަށް އެ ހިތް ސިގުނަލްތަކުން، ހޭ ލައްވަނީ ވި ކަރަންޓަކުން

   އެރުމުން ބުރޫ ސިގުނަލްތަކަށް، ބަލި މީހަކަށް ހުރެ ވާގޮތުން

 

ޕުރެސަރު ހިތާ ލޭގައި ހިނގާ، ހަމަކޮށްދެނީ ދޭ ބާރަކުން

   ހުރެ ހުއްޓުމެއް ނެތި ވިންދުގާ، ތެޅިތެޅި އެ ހިތް ހުރެ ވާގޮތުން

 

ހުއްޓިއްޖެ ނަމައީ ހިތް ހިނގުން، ލޭ ދައުރުވުންވެސް ބަންދުވޭ

   ހުއްޓާ އެހެން އިރުކޮޅަކުވެސް، މަރުވާ ގޮތާ މެދު ވިސްނުމުން

 

ހެކިވޭ އިލާހަކު ވާކަމާ، ޤުދުރަތުގެ މި އަޖައިބުކަމާ

   އެކި ނާރުތައް ތަރުތީބަކުން، އެހިތާއި ގުޅިފާ ވާގޮތުން