"އިހަށްނުވި ރައްކަލެއް ފަހަކުން ނުވެވޭނެއެވެ." މިއީ ދިވެހި އަދަބީ ބަސްތަކުގެ ތެރެއިން "ހަރު ބަހެކެވެ".

މިބަހުހެ ބަހަވީ މާނައަށް ވިސްނާލަމާ ހިނގާށެވެ. މިބަހުގާ އެ ބުނަނީ މިހާރު ނުވި ރައްކާތެރިކަމެއް، ދެން ފަހުން ނުވެވޭނެ ވާހަކައެވެ. މިއީ ހަގީގަތުގައި ވަރަށްވެސް މޮޅު ވާހަކައެކެވެ.

މިބަސް ބުނެ އުޅެނީ ނުރައްކަލެއްގެ އިންޒާރު ލިބިފައިވާ ވަގުތެއްގައެވެ. އެ ނުރައްކަލެއް އައުމުގެ ކުރިން އެކަމުން ރައްކާވެ ތިބުމަށް ކުރަން ހުރި ކަމެއް ކޮށްގެން ތިބުމަށެވެ. އެހެނީ އެ ނުރައްކަލެއް އައިސް ޖެހުމުން ދެން ކުރެވޭނޭ މާ ބޮޑުކަމެއް ނޯންނާނެތީއެވެ. ކަންކަމުން ސަލާމަތްވެ ތިބުމަށްވެސް އެންމެ ރަނގަޅުގޮތަކީ އެކަމެއް ވުމުގެ ކުރިން އެކަމަކާއި މެދު ވިސްނާ، އެކަމަކުން ސަލާމަތްވާނޭ މަގުތައް ކޮށާ އެމަގުތަކުގައި ފައި އެޅުމެވެ.

ކާރީސާތަކުން ރައްކާތެރިވުމަށާއި ބޮޑެތި ބަލިތަކުން ފިޔެވުމަށް، އެކަން ކަމުގެ އިންޒާރުގެ ވަގުތުގައި މި ބަސް ބުނެއުޅެއެވެ.

މިސާލަކަށް މިދުވަސްވަރު ދިމައިވެގެން މިއުޅޭ ކޮވިޑްގެ އިންޒާރު ދީފައިވި ދުވަސްވަރު، މާސްކު އެޅުމާ އަތް ދޮއުމަށް ދިޔައީ ނަސޭހަތްތެރިވެ އިރުޝާދު ދެމުންނެވެ. އެއީ މި ބަހުގާ މިބުނާ ރައްކަލުގެ ވާހަކައެވެ. މުޖުތަމައުގައި ބަލި ފެތުރުމުގެ ކުރިން އެރައްކާ ނުވެ ތިބުމުން، މުޖުތަމައުގައި ބަލި ފެތުރެންފެށި ފަހުން ދެން އިތުރަށް އެރައްކާތެރިކަމުގެ ފިޔަވަޅުއެޅިކަމުގައި ވީނަމަވެސް މުޖުތަމަގައި ބަލި ނުފެތުރޭ ކަމަކަށް ނުވާނެއެވެ.

ކަންމިހެން ހުރުމާއެކު އެފަދަ އިންޒާރުގެ ވަގުތުގައި ރައްކާތެރިކަމުގެ ފިޔަވަޅުތަށް އެޅުމަށް ބާރުދިނުމުގެ ގޮތުން، "އިހަށްނުވި ރައްކަލެއް ފަހަކުން ނުވެވޭނޭ" ބުނެ އެޅެއެވެ.