އަމުދުން މިތާ ފަރުވާ ވެގެން، ހުއްޓަސް މަގޭ ހެދިގޯހަކުން

     ކަމުގައި އެވާ ކޮވިޑުގެ ވަބާ، މިފުރާނަޔަށް ހަމަލާ ދިނޭ

އަނގައިންކަމެއް ނޯށުން ކަމެއް، ނޭނގޭ އެސޮރު އަދި ވަތްގޮތެއް

     ރަނގަބީލު ބިރުވެރި ޖެހިޔަކަސް، މޭގާ އެސޮރު މަޑުކޮށް އިނޭ

މަޑުކޮށް އެދިން ހަމަލާތަކުން، މުޅި މޭ މަގޭ ފުނޑު ކޮށްލިއޭ

     މަޑު ވެއްޖެއޭ ރަހަލުން މުޅިން، އަރުތެރެ މުޅިން ބައްދާ ދިނޭ

ރުންކުރު ވެގެން ނޭވައި ދިއޭ، މޭގާ ވަނީ ރިހުމާއި ވޭން

     ހުންވެސް ނިހާޔަތަށޭ އައީ، ކެއްސުން ފިލާކަސް ނޫޅުނޭ

ވަރުބަލި ވަރަށް ބޮޑަށޭ ވަނީ، އަމުދުން ދެލޯ ވެސް ނުހުޅުވޭ

     ފަރުވާދިނަސް ލޯ މެރިލަމުން، މަރުމަތި ހަނދާން ކޮށްދީ ބުނޭ

ބޭނުންވަނީ ގިނައިން ކުރަން، ހެޔޮ ޢަމަލުތައް މި ވަޞިއްޔަތާ

     ވޭނުން ތަދާ ލުއިވުން އަދާ، ދެންވުން ޝިފާ  އެދިގެން ބުނޭ