އިލެކްޓްރިކް ވެހިކަލް (އީވީ) ކާރު ޗާޖުކުރާ ސްޓޭޝަނުގެ މަސައްކަތް ހަލުވި ސްޕީޑުގައި ކުރިއަށްދާ ކަމަށް ސްޓެލްކޯ އިން ބުނެފިއެވެ.

މި ކަން ހާމަކުރެއްވީ، ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ އެކްސްގައި ކުރެއްވި ޕޯސްޓެއްގައެވެ.

އެގޮތުން، އެ ޕޯސްޓްގައި އެމްޑީ ފަހުމީ ވަނީ، މި މަޝްރޫޢަކީ ރައީސުލްޖުމްހޫރިއްޔާ ޑރ. މުޢިއްޒު ގެންގުޅުއްވާ ތިމާވެށީގެ ހަރުދަނާ ސިޔާސަތުފުޅުތަކުގެ ތެރެއިން ދެމެހެއްޓެނިވި ގޮތެއްގައި ދަތުރުފަތުރުކުރުމުގެ ނިޒާމް ކުރިއެރުވުމަށާއި، ދިވެހިރާއްޖޭން ޖައްވަށް ދޫކުރާ ކާބަން މަދުކުރުމަށް އެ މަނިކުފާނު ވެވަޑައިގެންފައިވާ ވަޢުދުފުޅު ފުއްދުމަށް ކުރެވިގެންދާ މުހިއްމު މަސައްކަތެއްކަމަށް ވިދާޅުވެފައެވެ.

އަދި އިލެކްޓްރިކް ވެހިކަލް (އީވީ) ބޭނުންކުރާ ފަރާތްތަކަށް ސާފު ހަކަތަ ފަސޭހައިން ލިބި، އެކަމުގެ ސަބަބުން ގައުމު ތިމާވެށްޓާ ރައްޓެހި ހައްލުތަކަށް ބަދަލުވުމުގައި މުހިއްމު ދައުރެއް އަދާކުރާނެ ކަމަށް ވެސް ފަހުމީގެ ޕޯސްޓްގައިވެއެވެ.

ސްޓެލްކޯއިން ވަނީ ރައީސްގެ ތިމާވެށްޓާ ރައްޓެހި އަދި ދެމެހެއްޓެނިވި މުސްތަޤުބަލެއްގެ ތަޞައްވުރު ހާސިލްކުރުމަށް އެޙީތެރިވެދެއްވާ، އެ އަމާޒަށް ވާސިލްވުމަށްޓަކައި މި މަޝްރޫޢު ކަނޑައެޅިފައިވާ މުއްދަތުގައި ނިންމުމަށް ގަދައަޅައި މަސައްކަތްކުރަމުން ކަމަށް ވެސް ފަހުމީ ވަނީ ވިދާޅުވެފައެވެ.

ސްޓެލްކޯ އިން ގާއިމްކުރުމަށް މަސައްކަތްކުރަމުންދާ އިލެކްޓްރިކް ވެހިކަލް (އީވީ) ކާރު ޗާޖުކުރާ ސްޓޭޝަން ބެހެއްޓުމަށް ހަމަޖެހިފައިވަނީ އެ ކުންފުނީގެ ހެޑްއޮފީހާ އިންވެގެން އޮންނަ ދޮންއަދަރާދަ މަގުގައެވެ.