ބޮލީވުޑްގެ މަޝްހޫރު ޑައިރެކްޓަރު ރޯހިތު ޝެޓީގެ ކޮޕް ޔުނިވަރސްގެ ދެން ކުރިއަށް އޮތް ފިލްމު "ސިންގަމް އަގެއިން"ގެ މަސައްކަތްތައް ވަރަށް އަވަހަށް ފަށަން އުޅޭ ކަމަށް މަޢުލޫމާތު ލިބިއްޖެއެވެ. 

2011ވަނަ އަހަރު އަޖޭ ދޭވްގަންއާއެކު "ސިންގަމް"ގެ ނަމުގައި ފެށި ފްރެންޗައިސްގެ 3ވަނަ ފިލްމު "ސިންގަމް އަގެއިން"ގެ ޝޫޓިންގްތައް މިއަހަރުގެ ޖުލައި މަހު ފެށުމަށް ދަނީ ތައްޔާރުވަމުންނެވެ. އަދި ފިލްމު ރިލީޒްކުރަން ހަމަޖެހިފައިވަނީ 2024ވަނަ އަހަރުގެ ނޮވެންބަރުމަހުގެ ތެރޭގައެވެ. 

އެންމެ ފުރަތަމަ "ސިންގަމް"އަށްފަހު މީގެ ދެވަނަ ބައެއް އުފެއްދީ 2014ވަނަ އަހަރު "ސިންގަމް ރިޓާރންސް"ގެ ނަމުގައެވެ. ކާމިޔާބު މި ދެ ފިލްމަށްފަހު މި ދެ ފިލްމާ ގުޅުވައިގެން "ސިމްބާ"ގެ ނަމުގައި ފިލްމެއް އުފެއްދިއެވެ. އެފިލްމުގެ ލީޑުން ފެނިގެންދިޔައީ ރަންވީރް ސިންގއެެވެ. އަދި ފިލްމުގެ ޚާއްޞަ ހިސާބަކުން އަޖޭ ދޭވްގަން އޭނާގެ ސިންގަމް ކެރެކްޓަރގައި ފެނިގެންދެއެވެ. މީގެ އިތުރުން ފާހަގަކޮށްލަންޖެހޭ އަނެއް ކަމަކީ "ސިމްބާ"ގައި ނިމޭ ތަނުން ރޯހިތުގެ "ސޫރްޔަވަންޝީ"ގެ ޓީޒާ ވެސް ފެނިގެން ދިޔުމެވެ. މިއީ އިންޑިއާ ސިނަމާގައި ތަފާތު ދައްކާލި ފިލްމެކެވެ. ރޯހިތުގެ ކޮޕް ޔުނިވަރސް ގިނަ ބަޔަކަށް ކަމުދިޔައީ މިހެންވެއެވެ. މި ޖޯންރާގެ ހުރިހާ ފިލްމެއް ވެސް އެއް ފިލްމު އަނެއް ފިލްމާ ގުޅިފައިވާތީއެވެ.

"ސިމްބާ"އަށްފަހު 2021ވަނަ އަހަރުގެ ތެރޭގައި ވަނީ ކޮޕް ޔުނިވަރސްއަށް އަކްޝޭ ކުމާރު ވެސް ގުޅިފައެވެ. ތަފާތު ގޮތަކަށް ރޯހިތު ޑައިރެކްޓްކޮށް ގެނެސްދިން "ސޫރްޔަވަންޝީ"ގައި އޭނާގެ ކުރީގެ ކޮޕް ފިލްމުތަކުގެ 2 އެކްޓަރުން ވެސް ވަނީ ފެނިގެންގޮސްފައެވެ. އެއީ "ސިންގަމް (އަޖޭ)"އާއި "ސިމްބާ (ރަންވީރް)"އެވެ. 

2024ވަނަ އަހަރު "ސިންގަމް"ގެ 3 ވަނަ ފިލްމު ރިލީޒްކުރަން ތައްޔާރުވަމުން އަންނައިރު ފާހަގަކޮށްލަންޖެހޭ އަނެއް ކަމަކީ "ސިންގަމް އަގެއިން"ގައި މި ޔުނިވަރސްއަށް އަންހެން ކޮޕެއް ވެސް ގުޅޭނެ ކަމެެވެ. އަދި އެއީ ދީޕިކާ ޕަދުކޯން ކަމަށް މިހާރު ރޯހިތު ވަނީ ބެލުންތެރިންނަށް ޙިއްޞާކޮށްފައެވެ. އަދި ހަމައެހެންމެ ނިމިދިޔަ ފިލްމުތަކެކޭ އެއްފަދައިން "ސިންގަމް އަގެއިން"ގައި އަޖޭގެ އިތުރުން ރަންވީރާއި އަކްޝޭ ވެސް ލީޑު ރޯލުތަކުން ފެނިގެންދާނެއެވެ. ރޯހިތުގެ ކޮޕް ޔުނިވަރސް މިހާ ފުޅާ ވެގެން ދިޔައިރު ގާތްގަނޑަކަށް ބުނާނަމަ އިންޑިއާގެ ކޮޕް ހުރިހާ ލީޑެއް އެއް ފިލްމަކުން ފެނުމަކާ މިވަނީ ގާތްވެފައެވެ. މިހިސާބުން ނިމުނީކީ ނޫނެވެ. ބޮލީވުޑްގެ ސުޕަރސްޓަރ ސަލްމާން ޚާން އޭނާގެ ޗުލްބުލް ޕާންޑޭގެ ކެރެކްޓަރގައި މިފިލްމުން ފެނިގެންދާނެ ކަމަށް ވެސް ނުސީދާކޮށް ރޯހިތު ވަނީ ބުނެފައެވެ. އަދި ލަފާކުރެވޭ ގޮތުގައި މި ފިލްމުގެ ވިލަންގެ ރޯލު ކުޅޭނީ ޖެކީ ޝްރޮފެވެ. މިހާވަރުން ވެސް މި ފިލްމަކީ ކާމިޔާބު ފިލްމަކަށް ވެގެންދާނެ ކަމާމެދު އެއްވެސް ޝައްކެއް ކުރެވޭކަށް ނެތެވެ. 

"ސިންގަމް އަގެއިން"ގެ ޓީޒާއެއް ކަމަށް ގިނަބަޔަކު ބުނަމުންދާ ޚާއްޞަ މަންޒަރެއް "ސޫރްޔަވަންޝީ"ގައި ވެއެވެ. އެމަންޒަރު ތިރީގައި އެވަނީއެވެ.  

އަޖޭ ދޭވްގަން ދެން އެންމެ އަވަހަށް ފެނިގެންދާނީ އޭނާގެ ޑައިރެކްޝަންގެ ދަށުން ގެނެސްދޭ ފިލްމު "ބޯލާ"އިންނެވެ. އަދި އެފިލްމަށްފަހު އޮތީ "ސިންގަމް އަގެއިން"ގެ ޝޫޓިންގތަކެވެ. ހަމަ ޤައިމުވެސް މިއީ އަޖޭ، ރަންވީރް، އަކްޝޭ އަދި ސަލްމާންގެ ފޭނުންނަށް ވަރަށް އުފާވެރި ޚަބަރެކެވެ.