އަންހެނުންނާއި ފިރިހެނުންގެ ހަށިގަނޑުގެ މެޓަބޮލިޒަމްގެ ތަފާތުތަކާ ގުޅިގެން، ހެނދުނުގެ ނާސްތާގައި ކާންވާނީ ތަފާތު ކާނާ ކަމަށް އާ ދިރާސާއަކުން ދައްކައިފި އެވެ.

ކޮމްޕިއުޓަސް އިން ބަޔޮލޮޖީ އެންޑް މެޑިސިންގައި ޝާއިޢުކޮށްފައިވާ ދިރާސާއިން ދައްކާ ގޮތުގައި ފިރިހެނުންގެ ހަށިގަނޑަށް ކާބޯހައިޑްރޭޓް ގިނަ ކާނާ ބޭނުންވާއިރު، އަންހެނުންގެ ހަށިގަނޑަށް ބޭނުންވަނީ ފެޓް ގިނަ ކާނާ އެވެ.

ބެންގަލޫރުގެ ކްލައުޑްނައިން ހޮސްޕިޓަލްސްގެ ކްލިނިކަލް ނިއުޓްރިޝަނިސްޓް ސުސްމިތާ އެން ބުނީ އަންހެނުންނާއި ފިރިހެނުންގެ ހަށިގަނޑުގެ ހޯމޯން ތަފާތުވުމާއި، ޖެނެޓިކް ތަފާތުތަކުގެ ސަބަބުން ކާބޯހައިޑްރޭޓާއި ފެޓް ބޭނުންކުރާ ގޮތް ތަފާތުވާ ކަމަށެވެ.
އޭނާ ބުނި ގޮތުގައި އަންހެނުންގެ ހަށިގަނޑުގައި އިންސިއުލިން ސެންސިޓިވިޓީ މަތިވުމުގެ ސަބަބުން ހަށިގަނޑުގެ ހަކަތައިގެ ގޮތުގައި ފެޓް ބޭނުންކުރުމުގައި ފަސޭހަވާއިރު، ފިރިހެނުންގެ ހަށިގަނޑުގައި މަސްތަކުގެ ސަބަބުން ކާބޯހައިޑްރޭޓް ރައްކާކުރުމުގެ ގާބިލުކަން މައްޗެވެ.