ކޮންމެ ބައްޔަކުންވެސް އަވަހަށް ރަނގަޅު ވުމަށްޓަކައި ރަނގަޅު ކާނާ ކެއުމަކީ މުހިންމު ކަމެކެވެ. ޗިކުންގުންޏާ އަކީ އެބަލި ޖެހުމުން ހުންއައިސް، ހުޅުތަކުގައި ރިއްސާ، ބޮލުގައި ރިއްސާ އަދިރޯގާގެ އަސަރު ފެންނަ ބައްޔެކެވެ. މި ބަލީގެ ބައެއް އަލާމަތްތަކަކީ ބަލިން ރަނގަޅުވާ ފަހުންވެސް އެތައް ދުވަހެއް ވަންދެން ހުރެދާނެ އަލާމާތަތަކެއް ކަމުން ބަލީގެ ފަރުވާގެ އިތުރުން ރަނގަޅުކާނާ ކެއުމުން އަލާމާތަތައް ފެންނަ މުއްދަތު ކުޑެވެއެވެ. 

ޗިކުންގުންޏާ ޖެހިއްޖެނަމަ ގިނަ ގިނައިން ކުރުނބާފެން ބުއިން ރަނގަޅެވެ. ސަބަބަކީ ކުރުނބާ ފެނުން ހަށިގަނޑު ހައިޑްރޭޓް ކޮށްދީ ޓޮކްސިންސް ބޭރުކޮއްދޭތީވެއެ. ހާއްސަކޮށް ހުމުގެއަސަރު ހުންނަ ނަމަ ގިނައިން ދިޔާ އެއްޗެހި ބުއިމަކީ ފަރުވާ ބަހައްޓައިގެން ކުރަންވާނެ ކަމެކެވެ. ކުރުނބާ ފެނަކީ ދުވާލަކު ދެފަހަރު އަދި ތިން ފަހަރުވެސް ބޮވިދާނެ އެއްޗެކެވެ. އަދި މީގެއިތުރުން ރާއްޖޭގައި ފަސޭހައިން ލިބެން ހުންނަ އެއްޗެކެވެ. ކުރުނބާ ފެނުގެ އިތުރުން ކެއުމުގައި ތަރުކާރީއާއި މޭވާވެސް ހިމަނަންވާނެއެވެ. ތަރުކާރީއާއި މޭވާއަކީ އެއްވެސް ބައްޔެއްނުވިކަމުގައި ވިޔަސް އާންމުކޮށް ކެއުމުގައި ހިމަނަން ޖެހޭ އެއްޗެެއްކެވެ. ނަމަވެސް ޗިކުންގުންޏާ ޖެހިއްޖެނަމަ ކެއުމުގައި ތަރުކާރީއާއި މޭވާ ހިމެނުން ވަކިން މުހިންމެވެ. މީގެ އިތުރުން ޗިކުންގުންޏާ ޖެހިފައިވާ ނަމަ ކެއުމުގައި ފަތްޕިލާވެލީގެ ބާވަތްތައްވެސް ހިމެނުން ވަރަށް މުހިންމެވެ. ފަތްޕިލާވެލީގައި ހިމެނޭ ނިއުޓްރިއެންޓްސްގެ ސަބަބުން ޗިކުންގުންޏާގެ އެއް އަލާމަތްކަމަށްވާ ހުޅުތަކުގައި ރިއްސުން ވަރަށް ބޮޑުތަނުން ކުޑަވެއެވެ. 

ބާރުލީއަކީ މިހާރު އާންމުކޮށް މީހުން ކައިއުޅޭ އެއްޗެއް ނޫން ކަމުގައި ވިޔަސް ޗިކުންގުންޏާ ޖެހިފައިވާނަމަ ބަރުލީ ކެއުމުގައި ހިމެނުމުން ފުރަމޭ (ލިވަރ) ޑިޓޮކްސް ކޮށްދެއެވެ. ޗިކުންގުންޏާ ޖެހިފައިވާ ނަމަ ވީހާވެސް ގިނައިން ވިޓަމިން ސީ ހިމެނޭ ކާނާ ކެއުމުން ބަލިން އަވަހަށް ރަނގަޅު ވުމުގެ ފުރުސަތު ބޮޑެވެ. އަދި ގިނައިން ހަކުރުއާއި ތެޔޮ ހުންނަ ކާނާއާއި ކުޅިކޮށް ކެއުމުންދުރުހެލިވާން ވާނެއެވެ. 

ޗިކުންގުންޏާ ޖެހުނީމަ ގައިގައި އަދި ހުޅުތަކުގައި ރިއްސުން ކުޑަކުރުމަށް ރީނދޫއަދި އިނގުރު ބޭނުން ކުރެވިދާނެއެވެ. ރީނދުލަކީ ވަރަށް ބައިވަރު އެންޓި އޮކްސިޑަންޓްސްއާއި އެންޓިއިންފްލެމެޓްރީ އޭޖެންޓްސް ހިމެނޭ އެއްޗެއް ކަމުން ތަދު ކުޑަ ކުރުމަށް ވަރަށް ބޮޑަށް އެހީވެދެއެވެ. ޗިކުންގުންޏާ ޖެހުމުން ވީހާވެސް ގިނައިން އަރާމު ކުރުމުގެ އިތުރުން ބަލީގެ އަލާމަތްތައް ފިލިކަމުގައި ވިޔަސް 7 ދުވަސް ވަންދެން ބުރަ މަސައްކަތް ނުކޮށް އަރާމު ކުރަންވާނެއެވެ. 

ބަލިން ރައްކާތެރި ވުމަށްޓަކައި ވީހާވެސް ހަށިގަނޑު ނިވާވާ ކަހަލަ ހެދުން އަޅާށެވެ. އަދި މަދިރި އާލާވާ ކަހަލަ ތަންތަން ނައްތާލުމުގެ އިތުރުން މަދިރިން ރައްކާތެރި ވުމަށް ހުންނަ “މޮސްކިޓޯރިޕެލެންޓްސް” ބޭނުން ކުރުމުން ބަލި ޖެހުމުގެ ފުރުސަތު ކުޑަވެއެވެ.