މޯލްޑިވްސް އިންޓަގްރޭޓެޑް ޓުއަރިޒަމް ޑިވެލޮޕްމެންޓް ކޯޕަރޭޝަން، އެމްއައިޓީޑީސީން އިންތިޒާމްކޮށް މުޅި ދުނިޔެއަށް ހުޅުވާލައިގެން ރާއްޖޭގައި ބާއްވާ "ސަވާދީއްތަ ދަތުރު" ގެ 3 ވަނަ އެޑިޝަން އަންނައަހަރުގެ ފެބްރުއަރީ މަހު ބޭއްވުމަށް ހަމަޖެހިފައިވާކަމަށް އެކުންފުނިން ހާމަކޮށްފިއެވެ.  "މޯލްޑިވްސް- އަ ސްމޯލް ކަންޓްރީ ވިތް އަ ބިގް ހާރޓް " ޝިއާރުގެ ދަށުން ކުރިއަށްގެންދިއުމަށް ނިންމާފައިވާ "ސަވާދީއްތަ ދަތުރު" ގެ ތިންވަނަ އެޑިޝަން ބޭއްވުމަށް ހަމަޖެހިފައިވަނީ 2024 ވަނައަހަރުގެ ފެބްރުއަރީ  10 ން 29 އަށެވެ. 3 ވަނަ އެޑިޝަންގައި ޒިޔާރާތްކުރާނެ ރަށްތަކާއި އަދި ތާރީޚުތައް  އިޢުލާނުކޮށްފައިވަނީ ގިނަ އަދަދެއްގެ ޔޮޓްސްމަނުންނާއި އަދި ދުނިޔޭގެ މަޝްހޫރު މެރީނާތަކާއި އެކު ބެއްވުނު ޚާއްސަ ވާރޗުއަލް ސެޝަނެއްގައެވެ.

ސަވާދީއްތަ ދަތުރު 2024 ހުގެ ރެލީ ފެށޭރަސްމިއްޔާތު ކުޑަގިރީގައި ބޭއްވުމަށްނިންމާފައިވާއިރު ޔޮޓް ދަތުރުކުރުމަށް ހަމަޖެފައިވާ ރަށްތަކުގެތެރޭގައި ވ. ފުލިދޫ ، މ.މުލި ، ލ.ގަން ، ލ.ފޮނަދޫ ، ގއ. ކޮލަމާފުށި ، ގދ. ހޯނޑެއްދޫ، ސ. ހިތަދޫ އަދި ސ. ގަން ހިމެނެއެވެ. މިއެޑިޝަން ނިންމާލުމުގެ ރަސްމިއްޔާތުގެ ގާލާނައިޓް ބޭއްވުމަށް ޤަސްތުކޮށްފައިވަނީ އައްޑޫ ސިޓީގައިކަމަށް އެމްއައިޓީޑީސީ އިން ވަނީ ހާމަކޮށްފައެވެ.

2024 ވަނަ އަހަރުގެ "ސަވާދީއްތަ ދަތުރު 3 " އެންޑޯޒްކޮށްފައިވާ ފަރާތްތަކުގެ ތެރޭގައި މިނިސްޓްރީ އޮފް ޓުއަރިޒަމް ، މިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖް، އެމްއެމްޕީއާރުސީ ، މަޓީ އަދި ނޭޝަނަލް ބޯޓިންގ އެސޯސިއޭޝަން ހިމެނެއެވެ.

މީގެއިތުރުން ޓޫރިޒަމްގެ އިލްމީ ދިރާސާތައްކުރާ ބައިނަލް އަޤްވާމީ ޖަމާއަތެއްކަމުގައިވާ، " އިންޓަރނޭޝަނަލް ޓޫރިޒަމް ސްޓަޑީސް އެސޯސިއޭޝަން" ވެސް ވަނީ މިރެލީ އެންޑޯޒްކޮށްފައެވެ.

މީގެ ކުރިން ބޭއްވުނު ދަތުރުތަކުގެ ނަތީޖާ އާއި ބައިވެރިންގެ ފަރާތުން ލިބުނު ޚިޔާލުތަކާއި މަޝްވަރާތަކުގެ އަލީގައި 2024 ވަނައަހަރުގެ ދަތުރަށް ބޮޑުބަދަލު ތަކެއް ގެނެވިފައިވާކަމަށް އެމްއައިޓީޑީސީއިން ވަނީހާމަކޮށްފައެވެ. މިފަހަރުގެ ދަތުރަކީ ފުރަތަމަ ފަހަރަށް އީކުއޭޓަރ ހުރަސް ކުރުމާއި އަދި ރާއްޖޭގެ ބޮޑު 2 ކަނޑެއް ހުރަސްކުރާ ރެލީއަށް ވެގެންދާނެކަމަށް ކުންފުނިން ހާމަކުރެއެވެ. އަދި " ސަވާދީއްތަ ދަތުރު 2024" ގައިވެސް ޒިޔާރާތްކުރާ ރަށްރަށުން މޯލްޑިވްސް ޕޮލިޓެކްނިކްގެ އެހީތެރިކަމާއިއެކު ލޯކަލް ގައިޑުން ތަމްރީންކުރުމުގެ އިތުރުން އެރަށްތަކުގެ ދަރިވަރުންނަށް ހުޅުވާލައިގެން ދަތުރުގެ ޝިއާރާގުޅޭ ކުރެހުމުގެ މުބާރާތެއްވެސް ބޭއްވުމަށް ހަމަޖެހިފައިވާކަމަށް ވަނީ މައުލޫމާތު ލިބިފައެވެ.

ކޮންމެ އަހަރަކު އެއްފަހަރު ސިލްސިލާ ގޮތެއްގައި ކުރިއަށް ގެންދެވޭ އިންޓަރނޭޝަނަލް ޔޮޓްރެލޯ " ސަވާދީއްތަ ދަތުރު" ގެ ފުރަތަމަ އެޑިޝަން ޖުމްލަ 7 ޔޮޓާއި އެކު  2022 ވަނަ އަހަރު ގައި ، އަދި ދެވަނަ އެޑިޝަން 14 ޔޮޓާއިއެކު 2023 ގައި ކާމިޔާބް ކަމާއިއެކު ވަނީ ކުރިއަށް ގެންގޮސްފައެވެ. މިރެލީތަކުގައި ލޯކަލް ޓޫރިޒަމް ، ހެރިޓޭޖް ޓޫރިޒަމް އަދި ރޫރަލް ޓޫރިޒަމް ހިމެނޭ ގޮތަށް ، ދަތުރުގެ ބައިވެރިންނަށް ރާއްޖޭގެ ޤުދުރަތީ މުއްސަނދިކަމާއި ރީތިކަމާއި ސާދާ ދިރިއުޅުމާއި ތާރީޚާއި ސަޤާފަތް ވަނީ ދައްކުވައިދީފައެވެ.

ސަވާދީއްތަ ދަތުރަކީ ދިވެހިރާއްޖޭގެ ޓޫރިޒަމް އިންޑަސްޓްރީގެ އިތުރުން ، ބައިނަލްއަޤްވާމީ ސެއިލް ކޮމިއުނިޓީ ބަލައިގަނެފައިވާ އިވެންޓެއް ކަމަށާއި މިއިވެންޓަކީ ދިވެހިރާއްޖޭގެ ޒަމާންވީ ތާރީޚާއި ، ޡަޤާފަތާއި ފަންނުވެރިކަމާއި ކެއިންބުއިމުގެ އާދަތަކާއި އެހާރާއި މިހާރުގެ ދިވެހިންގެ ކުޅިވަރުތައް މުޅިދުނިޔެއަށް ދައްކުވައިދޭން ލިބޭ ރަނުގެ ފުރުޞަތެކެވެ. ދިވެހީންނަކީ ޒަމާނުއްސުރި ރިޔަލު ދޯނީގައި މާސިންގާ ކަނޑުތައް ހުރަސްކޮށް، ރާއްޖެ އާއި ބޭރުގެ ކަރަތަކަށް ދަތުރުކުރި ކުޅަދާނަ ބައެއްކަމުން "ސަވާދީއްތަ ދަތުރު 3 " ގެ އެންމެބޮޑު އެއްމަޤްޞަދަކީ، ދިވެހިންގެ ޤަދީމީ މިހުނަރު ދިރުވާ އާލާކޮށް، ރާއްޖޭގެ މީހުން ދިރިއުޅޭ ރަށްތައް، މުޅިން ތަފާތު ނަޒަރަކުން ދުނިޔެއަށް އިޝްތިހާރުކޮށް ޕްރޮމޯޓްކުރުމުގައި އެހީތެރިކަން ފޯރުކޯށްދިނުންކަމަށް އެމްއައިޓީޑީސީއިން ހާމަކުރެއެވެ.