ނޫސްވެރިންގެ ގުންޒަރުގެ ނަމުގައި ރާއްޖޭގެ މީޑިއާތަކުގެ ނޫސްވެރިންނާ، އިންތިހާބީ ރައީސް ޑރ. މުޙައްމަދު މުޢިއްޒު ބައްދަލުކުރައްވައި ޙާއްސަ ފަރިއްކޮޅެއް ދެއްވައިފިއެވެ. 

ސޯޝަލް ސެންޓަރުގައި ރޭ ބޭއްވި މިހަފްލާގައި ރާއްޖޭގެ ގިނަ އަދަދެއްގެ ނޫސްވެރިން ވަނީ ބައިވެރިވެފައެވެ. މިއީ ފަހުގެ ތާރީހެއްގައި ރާއްޖޭގެ ގިނަ ނޫސްވެރިންނާއެކު މިފަދަ ހަފްލާއެއް ބޭއްވުނު ފުރަތަމަ ފަހަރެވެ.

ނޫސްވެރިންނާއެކު އިންތިހާބީ ރައީސް، ޑރ. މުހައްމަދު މުއިއްޒު ބައްދަލުކުރެއްވުމަށް ބޭއްވެވި ހަފްލާގެތެރެއިން. --ފޮޓޯ: ތީރު މީޑިއާ

މިގުންޒަރުގައި ނޫސްވެރިންގެ އިހުސާސްތައް ހިއްސާކުރުމުގެ ފުރުސަތުލިބި މީޑިއާތަކަށް ހުރި ގޮންޖެހުންތަކާއި ބެހޭގޮތުން މަޝްވަރާކޮށް ނޫސްވެރިކަމުގެ ދާއިރާ އިތުރަށް ކުރިއެރުވުމަށް ސަރުކާރުގެ އެއްބާރުލުމާއި އެކު ކުރެވޭނެ ކަންކަމާއި މެދު ވަނީ ވާހަކަ ދެކެވިފައެވެ.

މިހަފްލާގައި ވާހަކަ ދައްކަވަމުން އިންތިހާބީ ރައީސް ޑރ. މުއިއްޒު ވަނީ ރައްޔިތުންނަށް ހިދުމަތްކުރަން ނިކުންނަ މީހަކު ފޮރުވަންޖެހޭ ކަމެއް އޮވެގެން ނުވާނެކަމާއި ރައްޔިތުން ކަމަކަށް އެދެފިނަމަ އެކަމެއް ސާފުކޮށް ބަޔާން ކޮށްދެވެންވާނެކަމަށް ވިދާޅުވެފައެވެ. އަދި ނޮވެމްބަރު 17 ވަނަ ދުވަހު އެކުލަވާލެވޭ ސަރުކާރަކީ މީޑިއާ އަށް މައުލޫމާތުތައް ދިނުމުގައި ދެފުށް ފެންނަ ގޮތަށް މަސައްކަތް ކުރާނެ ސަރުކާރަކަށް ވެގެންދާނެކަމުގެ ޔަޤީންކަން ވަނީ ދެއްވާފައެވެ.

މީގެއިތުރުން ނޫސްވެރިންގެ ހިޔާލާ މަޝްވަރާއާއެއްގޮތަށް ސަރުކާރުގެ ސިޔާސަތުތައް ބައްޓަންކުރައްވާނެކަމަށް ވެސް ފާހަގަކުރެއްވެވިއެވެ.

އަދި ދައުލަތުގެ ބަޖެޓުން މީޑިއާތަކަށް ވަކި އިންސައްތައެއް ކަނޑައެޅުއްވުމަށް މަޖްލީސް މެދުވެރިކޮށް މަސައްކަތް ކޮށްދެއްވާނެކަމަށް ވަނީ ވިދާޅުވެފައެވެ. މީގެއިތުރުން ތައުލީމީ ނިޒާމުގެ ތެރެއިން ނޫސްވެރިކަން ކިޔެވޭނެމަގުފަހި ކޮށްދެއްވާނެކަމަށް ވިދާޅުވިއެވެ.