އާންމު އިޖުތިމާއި މިންގަނޑާ ހިލާފުކަންކަމުން ދުރުހެލިކުރުވުމަށް ޅ. ކުރެންދޫ ސްކޫލު ދަރިވަރުންނަށް މައުލޫމާތުދީފިއެވެ.

ކުރެންދޫ ޕޮލިސް ސްޓޭޝަނާއި ސްކޫލު ގުޅިގެން ޑިސެމްބަރު 4 ވަނަ ދުވަހު ކުރިއަށް ގެންދިޔަ އެ ސެޝަންތަކުގައި މައުލޫމާތުދީފައިވަނީ އެ ސްކޫލުގެ ގްރޭޑް 3 އިން 6 އަށް ތައުލީމު ހާސިލުކުރަމުންދާ ދަރިވަރުންނަށެވެ.

އެގޮތުން، އާންމު އިޖުތިމާއީ މިންގަނޑާ ހިލާފަށް ކުދިންނަށް ކުރެވޭ ކަންކަމާއި ދިރިއުޅުމުގެ އަދަބުތަކާއި މައިންބަފައިންނަށާއި ތިމާއަށް ވުރެ ބޮޑެތި މީހުންނަށް އިހުތިރާމުކުރުމާ އަދި އަބަދުވެސް އެންމެ ފުރަތަމަ އިސްވާނީ މައިންބަފައިންކަން ދަރިވަރުންނަސް ވިސްނައިދީފައިވެއެވެ.

އަދި މައިންބަފައިންނާއި މުދައްރިސުންގެ ބަސް އަބަދުވެސް އަޑުއެހުމަށާއި އެ މީހުންގެ ކުރިމަތީގައި އަޑުގަދަކޮށް ބަސް ނުބުނުމަށް ނަސޭހަތްތެރިވެފައި ވާއިރު ދީނީ ކަންކަމަށް ފަރުވާކުޑަ ނުކުރުމަށާ އަބަދުވެސް ވަގުތުން ވަގުތަށް ނަމާދުކުރުމަށާއި ގުރުއާން ކިޔެވުމުގައި ވަގުތު ހޭދަކުރުމަށް ވެސް ނަސޭހަތްތެރިވިއެވެ.

އޭގެ އިތުރުން، މަގުމަތީގައި އުޅޭއިރު ވިސްނަންޖެހޭ ކަންކަމާއި ތިމާއަށް ވުރެ ކުޑަކުއްޖަކަސް ބޮޑު މީހަކަސް ވާހަކަދެއްކުމުގައި ރިވެތި ބަސްމަގު ބޭނުން ކުރުމަށާއި ސްކޫލާއި ސްކޫލުން ބޭރުގައި ތިމާގެ އަހުލާގު ހިފެހެއްޓުމަށް ނަސޭހަތްތެރިވިއެވެ. އަދި ފިލާވަޅުތައް ދުވަހުން ދުވަހަށް މުޠާލިޔާކުރުމަށާ އޭރުން ކިޔެވުމުގައި އިތުރަށް ފަސޭހަވެގެން ދާނެކަން ދަރިވަރުންނަށް ވިސްނައިދީފައިވެއެވެ. އަދި ސްކޫލު ތެރޭގައި އެއް ކުއްޖަކު އަނެއް ކުއްޖަކަށް މަލާމާތްކުރުމުގެ ގޮތުން ބަސް ނުބުނުމަށާއި އެކުވެރިކަމާއި ހިތްހެޔޮކަން އިސްކުރުމަށާ އަދި އެއްބައިވަންތަކަން ބުނެދީފައިވެއެވެ.