މުޖުތަމަޢުގެ އަފުރާދުންގެ ސަގާފަތާއި އާދަކާދަތައް ބިނާކުރުމުގައި މީޑިއާ އަދާކުރަނީ ވަރަށްބޮޑު ދައުރެކެވެ. އެމީހުންގެ ހޭލުންތެރިކަން ބައްޓަންކުރަނީ މީޑިއާއެވެ. އެމީހުން ސަމާލުކަން ދޭންވީ މައްސަލަތައް ދައްކައިދެނީ މީޑިއާއެވެ. މީޑިއާއަކީ، މުޖުތަމަޢުގެ އަފުރާދުންގެ ބުއްދިއާއި ޝުޢޫރު ކޮންޓްރޯލްކޮށް އޭގެ މައްޗަށް ނުފޫޒު ހިންގާ ވަރުގަދަ ބާރެކެވެ. ވީއިރު މީޑިއާގެ ޒަރިއްޔާއިން މުޖުތަމައަށް ވަރުގަދަ ބޮޑެތި މެސެޖުތަކެއް ދޭން އެބަޖެހެއެވެ. އެގޮތުން ބަލާއިރު ދޫދިނުމުގެ ރީތި އާދަ މުޖުތަމަޢުގައި އަށަގެންނެވުމަށް މިއަދުގެ މީޑިއާތައް މަސައްކަތް ކުރަން އެބަ ޖެހެއެވެ.

މީޑިއާގެ ވަސީލަތްތަކުން އިސްކަން ދޭންޖެހޭ ކަމަކީ ދޫދިނުމުގެ ފަހިކަން ބަޔާންކޮށްދީ، ދޫދިނުމުގެ މާނަ އޮޅުންފިލުވައިދުނެވެ. ދޫދިނުމަކީ ބައެއް މީހުން ޤަބޫލުކުރާ ގޮތުގައި، އަނެކާއަށް މަޢާފުކޮށް، ތިމާގެ ޙައްޤު ދޫކޮށްލުމެވެ. އެއީ އޭނާ އަށް ކަމޭހިތައި، ޤަދަރުކުރުމުގެ ގޮތުންނެވެ. އޭނާގެ ކުރިމަތީ ތިމާ ހިމޭން ވުމުގެ ގޮތުންނެވެ. އެހެނަސް، ދޫދިނުމުގެ ހަގީގީ އެހެން މާނައެއް ވެއެވެ. އަސުލު މާނައަކަށް ވާނީވެސް އެ މާނައެވެ. އެއީ ދޫދިނުނުގެ ސަބަބުވެސް މެއެވެ. އާދޭހެވެ! އެއީ ހައްލުގެ ފެށުމެވެ. ދޫދިނުމަކީ ހައްލުގެ ފެށުމެވެ. އެހެންކަމުން ދޫދޭ މީހާއަކީ އެއްވެސް ހާލެއްގައި ދެރަ ނުވަތަ ނިކަމެތި މީހާއެއް ނޫނެވެ. އެއީ މާ ޤަދަރުވެރި މާ މާތް މީހެކެވެ. އެހެނީ އޭނާ ސުލްޙަ އާއި ހައްލަ ލޯބިކުރުން އިސްކުރީތީއެވެ.

މީޑިއާގެ ދައުރު އަދާކުރަންވީ މިކަމުގައެވެ. މުޖުތަމަޢަށް ބުނެދޭން ވީ މިވާހަކަ ތަކެވެ. ކިޔައިދޭންވީ ސުލްޙަ ގާއިމު ކުރަންވީ ގޮތުގެ ވާހަކައެވެ. ދޫދިނުމުން ޙާޞިލުކުރެވިދާނެ އެތައް ފަހި ކަންތައްތަކެއް ވާކަމެވެ. އެއިން ކޮންމެ ކަމެއް ތަމްސީލެއްގެ ސިފައިގައި ނުވަތަ ތަޞްވީރެއްގެ ސިފައިގައި އުފެއްދިދާނެއެވެ. މިއިން މުޖުތަމައަށް ކުރާނޭ ފައިދާ ވަޒަން ކުރަން ނޭނގިދާނެއެވެ. އެހެން ނަވެސް މީޑިއާގެ ޒަރިއްޔާއިން ފަތުރާ ނުވަތަ ފެތުރޭ އެހެން އެފަދަ ވާހަކަތަކަކީ ދާދި ފަސޭހައިން ވައިގައި ހިފައިގެންދާ ވާހަކަ ތަކެވެ. އެހެން ކަމުން މި ރީތި އާދަ ވެސް އެފަދައިން މުޖުތަމައުގެ ވައިގައި ހިފައިގެން ގޮސްފި ނަމަ މިއީ ހަގީގަތުގައި މާދަމާގެ ޖީލު އެކަމާއި އުފާކުރާނޭ ކަމެކެވެ. އަދުގެ ޖީލާއި މެދު އެ ޖީލު ފަހުރުވެރިވާނޭ ކަމެކެވެ.